ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᑯᐊᐳᕇᓴᖓᓂ (ISR) ᐱᓕᕆᐊᖑᖃᑕᐅᔪᖅ QNIHS-ᑯᑦ ᓯᕗᓕᖅᑎᖃᖅᐳᑦ ᐊᒻᒪᓗ ᐊᑐᓕᖅᑎᑕᐅᓯᒪᓪᓗᑎᒃ ISR-ᑯᓐᓂᑦ. ᑖᒃᑯᐊ ISR-ᑯᑦ ᖃᐅᔨᓴᐃᓂᕐᒥ ᐱᓕᕆᐊᒃᓴᐅᔪᑦ ᐊᒻᒪᓗ ᓴᖅᑭᑎᑦᓯᓂᖏᑦ ᐱᑕᖃᓕᖅᑎᑦᓯᓂᐅᕗᑦ ᐃᑲᔪᖅᑕᐅᓯᒪᓪᓗᑎᒃ ᐊᕕᒃᑐᖅᓯᒪᓂᕐᒥ ᐅᖃᐅᔾᔪᐃᒋᐊᖅᑎᑦ ᑲᑎᒪᔨᕋᓛᖏᓂᑦ ᐱᔾᔪᑎᖃᖅᑎᒋᔭᐅᔪᓂᑦ ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᑯᐊᐳᕇᓴᖓᓂᑦ (IRC), ᓄᓇᓕᐅᔪᓂ ᑯᐊᐳᕇᓴᒋᔭᐅᔪᓂᑦ, ᐃᓄᑐᖃᕐᓂᑦ, ᒪᒃᑯᒃᑐᓂᑦ ᐃᓚᒋᔭᐅᖃᑕᐅᔪᓂᑦ ᐊᒻᒪᓗ ᐋᓐᓂᐊᖃᖅᑕᐃᓕᒪᓂᕐᒥ ᐱᔪᖕᓇᐅᑎᖃᖅᑐᓂᑦ. ᑖᒃᑯᐊ IRC-ᑯᑦ QNIHS-ᒋᔭᖓᓂ ᐱᓕᕆᐊᖃᖅᑎᐅᔪᑦ ᐊᑐᓕᖅᑎᑦᑎᓇᓱᐊᖅᐳᑦ ᖃᐅᔨᓴᐃᓂᐅᓗᓂ ᐱᓕᕆᐊᖑᓂᐊᖅᑐᒥᒃ ᐊᒻᒪᓗ ᖃᐅᔨᓴᐃᓂᐅᔪᖅ ᐱᓕᕆᐊᖑᓯᒪᑎᑕᐅᖁᓪᓗᒍ ᐃᓄᕕᐊᓗᖕᓄᑦ ᐱᔭᐅᓯᒪᓕᕈᒪᔪᑦ ᒪᓕᒃᑎᑕᐅᓗᑎᒃ, ᐃᑲᔪᖅᑎᖃᕐᓗᑎᒃ ᐱᓕᕆᖃᑎᖃᕐᓂᕐᒥᓐᓂ ᑲᓇᑕᒥ ᐃᓄᐃᑦ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᖃᐅᔨᓴᖅᑎᖏᑕ ᐱᓕᕆᐊᖃᖅᑎᒋᔭᖏᓂᒃ. ᑐᑭᓯᒋᐊᕐᕕᒃᓴᖁᑏᑦ ᑲᑎᖅᓱᐊᖑᕙᓪᓕᐊᓯᓂᐊᖅᑐᑦ ᐅᑭᐊᒃᓵᖓᓂ 2021, ᐱᓕᕆᐊᕆᔭᐅᓗᑎᒃ ᓄᓇᓕᐅᔪᒥᑦ ᐃᖅᑲᓇᐃᔭᖅᑎᑖᖑᓯᒪᓪᓗᑎᒃ ᖃᐅᔨᓴᖅᑎᒋᔭᐅᔪᓂᑦ ᑕᒪᐃᓐᓂᑦ ᓄᓇᓕᒋᔭᐅᔪᓂᑦ ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᑕ ᐃᓗᐊᓂᑦ. ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᖃᐅᔨᓴᐃᓂᐅᔪᖅ ᐃᓚᒋᐊᖅᓯᒪᑎᑦᑎᓂᐊᖅᐳᑦ ᐋᓐᓂᐊᖃᕐᓇᖖᒋᑦᑐᓕᕆᔨᓂᑦ ᐊᒻᒪᓗ ᖃᓂᖏᑕ ᐃᓗᐊᒍᑦ ᐋᓐᓂᐊᖃᓕᖅᑕᐃᓕᒪᓂᕐᒧᑦ ᖃᐅᔨᓴᐃᓂᐅᔪᓂᒃ ᐃᓚᐅᑎᑕᐅᓯᒪᓪᓗᓂ ᖃᐅᔨᓴᐃᓂᕆᔭᒥᓐᓄᑦ.

ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᑯᐊᐳᕇᓴᖓᑕ (IRC) ᖃᓄᐃᑉᐱᑖ ᑲᓇᑕᒥ ᐃᓄᐃᑦ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᖃᐅᔨᓴᖅᑎᖏᑕ (QNIHS) ᐃᖅᑲᓇᐃᔭᖅᑎᖏᑦ

ᓄᓇᑦᓯᐊᕗᑦᒥ ᐱᓕᕆᐊᖑᓂᖓ ᖃᓄᐃᑉᐱᑖ ᑲᓇᑕᒥ ᐃᓄᐃᑦ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᖃᐅᔨᓴᕐᓂᖓᑦ (QNIHS) ᐃᑲᔪᖅᑎᒌᒃᓱᑎᒃ ᐱᓕᕆᐊᖑᕗᖅ ᓄᓇᑦᓯᐊᕗᑦ ᒐᕙᒪᖓᓂᑦ ᐊᒻᒪᓗ ᓛᐸᑐᐊᕆ-ᒍᕆᓐᕕᐅᓪ ᐋᓐᓂᐊᖃᕐᓇᖖᒋᑦᑐᓕᕆᔨᖏᓂᑦ. ᑖᒃᑯᐊ ᖃᐅᔨᓴᐃᓂᕐᒥ ᐱᓕᕆᓂᐅᔪᑦ ᑐᑭᒧᐊᒃᑎᖃᖅᐳᑦ ᐊᕕᒃᑐᒃᓯᒪᓂᕐᒥ ᑐᑭᒧᐊᒃᑎᑦᓯᔩᑦ ᑲᑎᒪᔨᕋᓛᖏᓂᒃ ᐃᓚᖃᖅᓱᑎᒃ ᐋᓐᓂᐊᖃᕐᓇᖖᒋᑦᑐᓕᕆᔨᓂ ᐱᓕᕆᐊᖃᖅᑎᒻᒪᕆᐅᓂᒃ, ᒪᒃᑯᒃᑐᓂᑦ, ᐃᓄᑐᖃᕐᓂᑦ, ᓄᓇᓕᐅᔪᒥ ᐃᓚᒋᔭᐅᖃᑕᐅᔪᓂᑦ, ᐊᒻᒪᓗ ᐱᔾᔪᑎᖃᖅᑎᒋᔭᐅᔪᓂᑦ ᐊᔾᔨᒌᖖᒋᐅᖅᑐᓂ ᓄᓇᑦᓯᐊᕗᑦ ᒐᕙᒪᖓᑕ ᐃᖅᑲᓇᐃᔭᕐᕕᖏᓐᓂᑦ. ᑖᒃᑯᐊ ᑐᑭᒧᐊᒃᑎᑦᓯᔩᑦ ᑲᑎᒪᔨᕋᓛᖓᑦ ᐱᑕᖃᖅᑎᑦᓯᔨᐅᕙᒃᑐᑦ ᐱᒻᒪᕆᐅᔪᑎᒍᑦ ᑐᑭᒧᐊᒃᑎᐅᕙᓐᓂᕐᒥᓐᓂᒃ DHSD-ᑯᓐᓂ ᐱᓕᕆᐊᖃᖅᑎᐅᔪᓄᑦ ᐊᑐᓕᖅᑎᑕᐅᖁᓪᓗᒋᑦ ᖃᐅᔨᓴᐃᓂᕐᒥ ᐱᓕᕆᐊᖑᔪᑦ. ᑕᒪᐃᓐᓂᒃ ᖃᐅᔨᓴᐃᓂᕐᒧᑦ ᐃᓱᒪᓕᐅᕈᑎᐅᓯᒪᔪᓂᒃ ᐱᑕᖃᓕᖅᑎᑦᑎᒋᐊᖃᑦᑕᖅᐳᑦ ᓄᓇᑦᓯᐊᕗᑦᒥ ᐃᓚᒋᔭᐅᔪᑦ ᐱᓯᒪᓕᕈᒪᔭᖏᓐᓂᒃ. ᐊᕕᒃᑐᖅᓯᒪᓂᕐᒥ ᐱᓕᕆᐊᒃᓴᐅᔪᓄᑦ ᑲᑎᒪᔨᕋᓛᒋᔭᕗᑦ ᖃᐅᔨᓴᐃᓂᑦᑎᓐᓂ ᑕᒪᐃᓐᓂᒃ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᐱᔾᔪᑎᖃᖅᑐᓂᒃ ᐱᒻᒪᕆᐅᑎᐅᒋᔭᐅᓪᓗᑎᒃ ᐃᓄᖕᓄᑦ ᐱᓕᕆᓂᖃᖅᑎᑦᓯᕙᒃᑐᑦ, ᐅᐱᒍᓱᑦᓯᐊᖅᑎᑕᐅᓪᓗᑎᒃ ᐃᓄᐃᑦ ᐱᐅᓯᑐᖃᖏᓐᓂᒃ ᐊᒻᒪᓗ ᐊᑐᕐᓂᖃᖅᑎᑕᖏᓐᓂᒃ. ᑐᑭᓯᒋᐊᕐᕕᒃᓴᖁᑎᓂᒃ ᑲᑎᖅᓱᐃᕙᓪᓕᐊᓂᖅ ᐱᒋᐊᖅᑎᑕᐅᓂᐊᕐᑐᖅ ᐅᑭᐊᒃᓵᖓᓂ 2021, ᖃᐅᔨᓴᐃᔨᐅᓪᓗᑎᒃ ᐱᓕᕆᐊᖃᖅᑎᒻᒪᕆᐅᔪᓂᑦ ᑕᒪᐃᓐᓄᑦ ᓄᓇᓕᒋᔭᐅᔪᓄᑦ ᑎᑭᑉᐸᖕᓂᐊᖅᓱᑎᒃ ᐃᓄᐃᑦ ᓄᓇᓕᕆᓂᕐᒥ ᐊᕙᑎᒋᔭᐅᔪᓄᑦ ᖃᐅᔨᓴᐃᔭᖅᑐᕐᓯᒪᓗᑎᒃ.

ᓈᑕᓖ ᕼᐃᐅᕐ

ᓄᓇᕕᒃᒥ ᐱᓕᕆᐊᖑᓂᖓ ᖃᓄᐃᑉᐱᑖ ᑲᓇᑕᒥ ᐃᓄᐃᑦ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᖃᐅᔨᓴᕐᓂᖓᑦ (QNIHS) ᓯᕗᓕᖅᑎᖃᖅᐳᑦ ᓄᓇᕕᒃ ᐊᕕᒃᑐᖅᓯᒪᓂᖓᓂ ᐋᓐᓂᐊᖃᕐᓇᖖᒋᑦᑐᓕᕆᔨᑦ ᐊᒻᒪᓗ ᐃᓅᓯᓕᕆᔨᒃᑯᑦ ᑲᑎᒪᔨᖏᓐᓂᒃ ᐃᑲᔪᖅᑎᖃᖅᓱᑎᒃ ᐱᓕᕆᖃᑎᖃᕐᓂᒃᑯᑦ ᒪᑭᕕᒃ ᑯᐊᐳᕇᓴᖓᓂᒃ. ᓄᓇᕕᒃᒥ QNIHS-ᓄᑦ ᐱᓕᕆᐊᖃᖅᑎᐅᔪᑦ ᐊᑐᓕᖅᑎᑕᐅᖁᓪᓗᒋᑦ ᖃᐅᔨᓴᐃᓂᕐᒥ ᐱᓕᕆᓂᖃᓕᖅᓯᒪᕗᑦ ᐊᒻᒪᓗ ᑕᒪᐃᓐᓂᒃ ᐋᓐᓂᐊᖃᕐᓇᖖᒋᓐᓂᓕᕆᓂᕐᒧᑦ ᐱᔾᔪᑎᖃᖅᑐᓂᒃ ᐱᒻᒪᕆᐅᑎᑕᐅᓪᓗᑎᒃ ᓄᓇᕕᒻᒥᐅᓄᑦ ᐱᓕᕆᐊᖑᓯᒪᓕᖁᓪᓗᒋᑦ, ᐅᐱᒍᓱᑦᓯᐊᕐᓗᑎᒃ ᐃᓄᐃᑦ ᐱᐅᓯᑐᖃᕆᔭᖏᓂᒃ ᐊᒻᒪᓗ ᐊᑐᕐᓂᖃᖅᑎᑕᖏᓐᓂᒃ. ᐱᓕᕆᐊᖃᖅᑎᐅᔪᑦ ᑐᑭᒧᐊᒍᑎᒃᓴᖃᖅᑎᑕᐅᕗᑦ ᓄᓇᕕᒃ ᐋᓐᓂᐊᖃᕐᓇᖖᒋᑦᑐᓕᕆᓂᕐᒥ ᖃᐅᔨᓴᐃᓂᐅᔪᓄᑦ ᑐᑭᒧᐊᒃᑎᑦᓯᔨᑦ ᑲᑎᒪᔨᕋᓛᖏᓐᓂᑦ ᐃᓚᖃᖅᓱᑎᒃ ᐱᔾᔪᑎᖃᖅᑎᐅᔪᓂᑦ ᓄᓇᕕᒃ ᐊᕕᒃᑐᖅᓯᒪᓂᖓᓂ ᐋᓐᓂᐊᖃᕐᓇᖖᒋᓐᓂᓕᕆᓂᕐᒧᑦ ᐊᒻᒪᓗ ᐃᓅᓯᓕᕆᔨᒃᑯᑦ ᑲᑎᒪᔨᖏᓐᓂᑦ, ᒪᑭᕕᒃ ᑯᐊᐳᕇᓴᖓᓐᓂᑦ, ᑲᑎᕕᒃ ᐊᕕᒃᑐᖅᓯᒪᓂᕐᒥ ᒐᕙᒪᖓᓂᑦ, ᑲᑎᕕᒃ ᐃᓕᓐᓂᐊᕐᓂᓕᕆᔨᑦ ᑲᑎᒪᔨᖏᓐᓂᑦ, ᐋᓐᓂᐊᕐᕕᖕᓂᑦ, ᐊᕙᑕᖅ ᐱᐅᓯᑐᖃᓕᕆᔨᖏᓐᓂᑦ, ᖃᕐᔪᐃᑦ ᒪᒃᑯᒃᑐᑦ ᑲᑎᒪᔨᖏᓂᑦ ᐊᒻᒪᓗ INSPQ-ᖏᓐᓂᑦ (Institut national de santé publique du Québec). ᑖᒃᑯᐊ ᑲᑎᒪᔨᕋᓛᖑᔪᑦ ᖃᐅᔨᓴᐃᓂᕐᒥ ᐃᓱᒪᓕᐅᕈᑎᐅᓯᒪᔪᓂᒃ ᓄᓇᕗᒻᒥᐅᑦ ᐱᓯᒪᓕᕈᒪᔭᖏᓂᒃ ᐱᓕᕆᓂᖃᖅᑎᑦᓯᒋᐊᖅᐸᒃᑐᑦ. ᑐᑭᓯᒋᐊᕐᕕᒃᓴᖁᑎᓂᒃ ᑲᑎᖅᓱᐃᓂᖓᑦ ᐱᒋᐊᖅᑎᑕᐅᓂᐊᕐᑐᖅ ᐅᑭᐊᒃᓵᖓᓂ 2022, ᒪᕐᕈᐃᖑᓪᓗᑎᒃ ᐱᓕᕆᐊᖃᖅᑎᐅᔪᑦ ᖃᐅᔨᓴᐃᔭᖅᑐᕐᓯᒪᓂᐊᖅᑎᓪᓗᒋᑦ ᓄᓇᓕᒋᔭᐅᔪᓂ ᐅᖔᕙ ᑕᕆᐅᖓᑕ ᓯᒡᔭᖓᓂ ᐊᒻᒪᓗ ᕼᐊᑦᓴᓐ ᑕᕆᐅᖓᑕ ᓯᒡᔭᖓᓂ ᓄᓇᓕᒋᔭᐅᔪᓂᑦ.

ᔨᐊᓂ ᓯᒻᐳᕋᓲᑦ

ᓄᓇᕗᒻᒥ ᐱᓕᕆᐊᖑᓂᖓ ᖃᓄᐃᑉᐱᑖ ᑲᓇᑕᒥ ᐃᓄᐃᑦ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᖃᐅᔨᓴᕐᓂᖓᑦ (QNIHS) ᐃᑲᔪᖅᑎᒌᒃᓱᑎᒃ ᐱᓕᕆᐊᖑᕗᖅ ᐃᑲᔪᖅᑎᒌᒃᓱᑎᒃ ᐱᓕᕆᖃᑎᒌᖕᓂᖏᓐᓂᑦ ᓄᓇᕗᑦ ᑐᖖᒐᕕᒃ ᑎᒥᖁᑎᖓᓂᑦ ᐊᒻᒪᓗ ᓄᓇᕗᑦ ᒐᕙᒪᖓᓂᑦ. ᑖᒃᑯᐊ ᖃᐅᔨᓴᐃᓂᐅᔪᓄᑦ ᐱᓕᕆᐊᖃᖅᑎᑦ ᓯᕗᓕᖅᑎᖃᖅᑐᑦ ᓄᓇᕗᑦ ᐃᓄᐃᑦ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᖃᐅᔨᓴᐃᓂᕐᒥ ᑐᑭᒧᐊᒃᑎᑦᓯᔨᑦ ᑲᑎᒪᔨᕋᓛᖓᓂᑦ ᐃᓚᖃᖅᓱᑎᒃ ᐱᔾᔪᑎᖃᖅᑎᒋᔭᐅᔪᓂᑦ ᓄᓇᕗᑦ ᑐᖖᒐᕕᒃ ᑎᒥᖁᑎᖓᓂᑦ ᐊᒻᒪᓗ ᓄᓇᕗᒻᒥ ᐋᓐᓂᐊᖃᕐᓇᖖᒋᑦᑐᓕᕆᔨᒃᑯᖏᓐᓂᑦ. ᐃᓄᐃᑦ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᖃᐅᔨᓴᐃᓂᖓᑕ ᐅᖃᐅᔾᔪᐃᒋᐊᖅᑎᐅᓪᓗᑎᒃ ᑲᑎᒪᔨᕋᓛᖑᔪᑦ, ᐃᓚᖃᖅᓱᑎᒃ ᐊᔾᔨᒌᖖᒋᐅᖅᑐᓂᒃ ᐱᔾᔪᑎᖃᖅᑎᒋᔭᐅᔪᓂᑦ ᓄᓇᓕᐅᔪᑉ, ᐊᕕᒃᑐᖅᓯᒪᓂᐅᔪᓂ, ᐊᒻᒪᓗ ᓄᓇᑦᓯᐊᑉ ᖁᑦᑎᖕᓂᖏᓂᑦ, ᐱᑕᖃᖅᑎᑦᓯᔨᐅᕙᒃᑐᑦ ᐱᒻᒪᕆᐅᑎᐅᔪᑎᒍᑦ ᑐᑭᒧᐊᒃᑎᑦᓯᔨᐅᓂᕐᒥᒃ ᑐᑭᒧᐊᒃᑎᑦᓯᔨᑦ ᑲᑎᒪᔨᕋᓛᖏᑦ ᐋᖅᑭᒃᓱᐃᕙᓪᓕᐊᓂᖏᓐᓂ ᐊᒻᒪᓗ ᐊᑐᓕᖅᑎᑕᐅᓂᒃᓴᖏᑕ ᖃᐅᔨᓴᐃᓂᐅᔪᓄᑦ. ᑕᒪᒃᑯᐊ ᑲᑎᒪᔨᕋᓛᖑᔪᑦ ᖃᐅᔨᓴᐃᓂᕐᒥ ᑕᒪᐃᓐᓂᒃ ᓄᓇᕗᒻᒥ ᐃᓄᖏᑕ ᐱᓯᒪᓕᕈᒪᔭᖏᓂᒃ ᐃᓱᒪᓕᐅᕈᑎᐅᔪᓂᒃ ᐱᓕᕆᐊᖃᖅᑎᑦᓯᒋᐊᖅᐸᒃᑐᑦ. ᑐᑭᒧᐊᒃᑎᑦᓯᔨᐅᓪᓗᑎᒃ ᑲᑎᒪᔨᕋᓛᖑᔪᑦ ᖃᐅᔨᓴᐃᓂᕐᒥ ᐱᓕᕆᐊᖑᔪᓂ ᐱᓕᕆᐊᖑᖃᑕᐅᑎᑦᓯᒋᐊᖅᑎᐅᕗᑦ ᑕᒪᐃᓐᓂᒃ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᐱᔾᔪᑎᖃᖅᑐᓄᑦ ᐱᒻᒪᕆᐅᑎᑕᐅᓪᓗᑎᒃ ᐃᓄᖕᓄᑦ, ᐱᓕᕆᐊᖑᓂᖏᓐᓂ ᐅᐱᒍᓱᑦᑎᐊᖅᓱᑎᒃ ᐃᓄᐃᑦ ᐱᐅᓯᑐᖃᕆᔭᖓᓂᒃ ᐊᒻᒪᓗ ᐊᑐᕐᓂᖃᖅᑎᑕᖏᓂᒃ. ᓯᕗᓪᓕᐅᓪᓗᑎᒃ ᖃᐅᔨᓴᐃᓂᐅᕙᓪᓕᐊᔪᑦ ᓂᕆᐅᒋᔭᐅᕗᑦ ᐱᒋᐊᖅᑎᑕᐅᓯᒪᓕᕐᓂᐊᕐᓂᖏᑕ 2023-ᒥ, ᖃᐅᔨᓴᐃᔨᐅᓪᓗᑎᒃ ᐱᓕᕆᐊᖃᖅᑎᓂᑦ ᐃᖏᕐᕋᖃᑦᑕᕐᓂᐊᕐᓗᑎᒃ ᑕᒪᐃᓐᓄᑦ ᓄᓇᓕᒋᔭᐅᔪᓄᑦ ᓄᓇᕗᒻᒥ ᖃᐅᔨᓴᕐᓂᖃᕆᐊᖅᓯᒪᓗᑎᒃ.

ᒪᓚᐃᔭ ᒥᑭᔪᒃ