ᑖᒃᑯᐊ QNIHS-ᖑᔪᑦ ᐱᑕᖃᖅᑎᑦᓯᔨᐅᕙᓐᓂᐊᖅᑐᑦ ᑕᒪᐃᑎᒎᖅᑎᓯᒪᓪᓗᒋᑦ ᑕᐅᑦᑐᕆᔭᐅᔪᓂᒃ ᐃᓄᐃᑦ ᐋᓐᓂᐊᖃᕐᓇᖖᒋᑦᑐᓕᕆᓂᖏᓐᓄᑦ ᐊᒻᒪᓗ ᖃᓄᐃᖖᒋᑦᑎᐊᕋᓱᐊᕐᓂᖏᓐᓄᑦ ᑕᒪᐃᓐᓂ ᐊᕕᒃᑐᖅᓯᒪᓂᕆᔭᐅᔪᓂ – ᓱᓇᑦ ᐃᖏᕐᕋᑦᑎᐊᕐᓂᖃᖅᐸᑦ ᐊᒻᒪᓗ ᓇᐅᒃᑯᑦ ᐱᓕᕆᓂᐅᔪᑦ ᐱᐅᓯᒋᐊᖅᑎᑕᐅᔭᕆᐊᖃᖅᐸᑦ. ᐃᓄᐃᑦ ᓄᓇᖁᑎᓕᒫᖓᓂᑦ ᑲᑎᓐᓂᖃᓯᕗᓪᓕᖅᐹᕐᒥᒃ, ᑖᒃᑯᐊ ᑲᓇᑕᒥ ᖃᐅᔨᓴᐃᔨᐅᔪᑦ ᐃᓄᖏᓐᓂᑦ ᑲᑎᓯᒪᓗᑎᒃ ᐱᓕᕆᐊᖃᖃᑎᒌᓕᖅᑎᑦᑎᓂᐊᕐᒪᑕ. QNIHS-ᖑᔪᓄᑦ ᑐᑭᓯᒋᐊᕐᕕᒃᓴᖁᑎᓂᒃ ᑲᑎᖅᓱᐃᓯᒪᓕᕐᓂᐊᖅᐳᑦ ᑕᒪᐃᓐᓂᑦ ᓄᓇᓕᒋᔭᐅᔪᓂᑦ ᐃᓄᐃᑦ ᓄᓇᖁᑎᓕᒫᖓᓂ – ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂᑦ, ᓄᓇᕗᒻᒥᑦ, ᓄᓇᕕᖕᒥᑦ, ᐊᒻᒪᓗ ᓄᓇᑦᓯᐊᕗᒻᒥᑦ. ᐱᓕᕆᐊᖑᓂᐊᕐᒥᔪᖅ ᐃᓄᖕᓂᑦ ᐋᑐᕙᒥᑦ ᓯᕗᓪᓕᖓᓂᒃ ᖃᐅᔨᓴᐃᓂᖃᓕᖅᑎᓪᓗᒋᑦ ᐊᒻᒪᓗ ᐊᖏᒡᓕᒋᐊᖅᑎᑕᐅᓯᒪᔪᓐᓇᕆᓪᓗᓂ ᐃᓄᒋᐊᒃᑐᓂᕐᒧᐅᖑᔪᓄᑦ ᑭᖑᓂᐊᓂ ᐱᓕᕆᓂᖃᕐᕕᐅᓕᕐᓂᐊᕐᒥᔪᓂ.

QNIHS-ᖑᔪᑦ ᖃᐅᔨᓴᐃᓂᑐᐃᓐᓇᐅᖖᒋᒻᒪᑕ. ᑕᐅᑦᑐᕆᔭᖏᑦ ᐊᒻᒪᓗ ᐊᑐᓕᖅᑎᑕᐅᓯᒪᓂᖏᑦ QNIHS-ᓂ, ᐃᓚᖃᖅᑎᓪᓗᒋᑦ ᖃᐅᔨᒋᐊᖅᑕᐅᓯᒪᓂᖏᓂᒃ, ᓯᐊᒻᒪᒃᑎᖅᑕᐅᓯᒪᓂᖏᓐᓂᒃ ᐊᒻᒪᓗ ᐊᑐᖅᑕᐅᕙᓐᓂᖏᓂᒃ ᖃᐅᔨᔭᐅᓯᒪᓕᓚᐅᖅᑐᑦ, ᑐᕌᖓᑎᑕᐅᓯᒪᒻᒪᑕ ᐃᑲᔪᕈᑎᒃᓴᐅᖁᓪᓗᒋᑦ ᐊᑯᓃᖖᒋᑦᑐᒧᑦ ᐊᒻᒪᓗ ᐊᑯᓃᖅᑐᒧᖅ ᐊᓯᔾᔩᓯᒪᓕᕐᓂᒃᓴᓄᑦ ᑕᐃᒪᓗ ᐅᑭᐅᑦ ᐊᑐᖅᐸᓪᓕᐊᓂᖏᓐᓂ ᐱᐅᓯᒋᐊᖅᑎᑦᑎᓯᒪᓕᕋᔭᕐᓂᕐᒧᑦ ᐃᓄᐃᑦ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᐊᒻᒪᓗ ᖃᓄᐃᖖᒋᑦᑎᐊᕐᓂᓕᕆᓂᖏᑦ.