ᖃᓄᐃᑉᐱᑖ? ᑲᓇᑕᒥ ᐃᓄᐃᑦ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᖃᐅᔨᓴᖅᑎᖏᑕ ᐱᓕᕆᐊᖓᑦ
ᖃᓄᐃᑉᐱᑖ? ᑲᓇᑕᒥ ᐃᓄᐃᑦ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᖃᐅᔨᓴᖅᑎᖏᑦ (QNIHS) ᐃᓄᖕᓂᑦ ᐊᐅᓚᑕᐅᔪᑐᐊᖑᓪᓗᓂ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᖃᐅᔨᓴᐃᓂᕐᒥ ᐱᓕᕆᐊᖑᖕᒪᑕ ᐃᓚᐅᑎᑦᓯᓯᒪᓪᓗᑎᒃ ᐃᓄᖕᓂ ᖃᓄᑐᐃᓐᓇᖅ ᐅᑭᐅᓕᓐᓂᒃ ᐊᒻᒪᓗ ᑕᒪᐃᓐᓂᑦ ᓄᓇᓕᒋᔭᐅᔪᓂᑦ ᓯᑕᒪᐅᓪᓗᑎᒃ ᐃᓄᐃᑦ ᐊᕕᒃᑐᖅᓯᒪᓂᖏᓐᓂᑦ, ᐱᖃᓯᐅᑎᓪᓗᒋᑦ ᐃᓚᖏᑦ ᐃᓄᒋᐊᒃᑐᓂᕐᒥᐅᓂ ᐃᖅᑲᓇᐃᔭᕐᕕᒋᔭᐅᔪᑦ. ᑖᒃᑯᑎᒎᓇᖅ ᐱᓕᕆᐊᒃᑯᑦ ᑲᑎᖅᓱᐃᕙᒃᑐᑦ ᓄᑕᐅᓂᖅᐸᐅᔪᓂᒃ ᑐᓴᒐᒃᓴᖁᑎᓂᒃ ᐱᔭᐅᓯᒪᓕᕆᐊᖃᖅᑐᓂᒃ ᓄᓇᓕᒋᔭᐅᔪᓂᑦ, ᐃᓄᐃᑦ ᑲᑐᔾᔨᖃᑎᒌᖏᓐᓂᑦ ᐊᒻᒪᓗ ᐃᓱᒪᓕᐅᕈᑎᓕᐅᖅᑎᓂᒃ ᐱᐅᓂᖅᓴᑎᒍᑦ ᑐᑭᓯᔭᐅᓯᒪᓕᖁᓪᓗᒋᑦ ᐃᓄᐃᑦ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᓴᖖᒋᓂᖃᕐᕕᒋᔭᖏᓂᒃ ᐊᒻᒪᓗ ᐱᓕᕆᐊᒃᓴᕆᔭᐅᔪᓂᒃ ᐊᕕᒃᑐᖅᓯᒪᓂᐅᔪᑦ ᐊᒻᒪᓗ ᑲᓇᑕᐅᑉ ᖁᑦᑎᖕᓂᖏᑎᒍᑦ.
ᖃᓄᐃᑉᐱᑖ? ᑲᓇᑕᒥ ᐃᓄᐃᑦ ᐋᓐᓂᐊᖃᕐᓇᒋᑦᑐᓕᕆᓂᕐᒧᑦ ᖃᐅᔨᓴᖅᑎᖏᑕ ᐱᓕᕆᐊᖃᖅᑎᐅᓪᓗᑎᒃ ᑎᒥᖁᑎᖓᑦ (NIHSWG), ᐱᓕᕆᖃᑎᒋᓪᓗᒋᑦ ᐊᕕᒃᑐᖅᓯᒪᓂᕐᒥ ᐃᓄᐃᑦ ᐋᓐᓂᐊᖃᕐᓇᒋᑦᑐᓕᕆᓂᕐᒧᑦ ᖃᐅᔨᓴᖅᑎᑦ ᑐᑭᒧᐊᒃᑎᑦᓯᔨᐅᓪᓗᑎᒃ ᑲᑎᒪᔨᕋᓛᖏᓂᒃ, ᓯᕗᓕᖅᑎᐅᕙᒃᑐᑦ ᑕᒪᐃᓐᓂ ᐱᓕᕆᐊᖃᕐᓂᐅᕙᓪᓕᐊᔪᓂ QNIHS-ᓂᒃ ᐋᖅᑭᒃᓱᐃᕙᓪᓕᐊᓂᕐᓄᑦ ᐊᒻᒪᓗ ᐊᑐᓕᖅᑎᑦᓯᕙᓪᓕᐊᓂᕐᓄᑦ. ᑖᒃᑯᐊ NIHSWG NIHSWG-ᑯᑦ ᐱᔾᔪᑎᖃᖅᑎᖃᖅᑐᑦ ᐅᑯᓇᖖᒐᑦ:
- ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᑯᐊᐳᕇᓴᖓᑦ
- ᓄᓇᕗᑦ ᑐᖖᒐᕕᒃᑯᑦ ᑎᒥᖁᑎᖓᑦ
- ᒪᑭᕕᒃ ᑯᐊᐳᕇᓴᖓᑦ
- ᓄᓇᑦᓯᐊᕗᑦ ᒐᕙᒪᖓᑦ
- ᓄᓇᕗᒻᒥ ᒐᕙᒪᖓᑦ
- ᓄᓇᑦᓯᐊᕐᒥ ᒐᕙᒪᖓᑦ
- ᓛᐸᑐᐊᕆᒥ ᒍᕆᓐᕕᐊᓪ ᐋᓐᓂᐊᖃᕐᓇᖖᒋᑦᑐᓕᕆᔨᖏᑦ
- ᓄᓇᕕᒃ ᐊᕕᒃᑐᖅᓯᒪᓂᕐᒥ ᐋᓐᓂᐊᖃᕐᓇᖖᒋᑦᑐᓕᕆᔨᒃᑯᑦ ᐊᒻᒪᓗ ᐃᓅᓯᓕᕆᔨᒃᑯᑦ ᐱᔨᑦᓯᕋᖅᑎᖏᑕ ᑲᑎᒪᔨᖏᑦ
- ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᑦ – ᑲᓇᑕᒥ (ᓂᕈᐊᕈᓐᓇᖖᒋᑦᑐᑦ)
- ᐃᓄᐃᑦ ᑕᐱᕇᑦ ᑲᓇᑕᒥ (ᓂᕈᐊᕈᓐᓇᖖᒋᑦᑐᑦ)
- ᑲᓇᑕᒥ ᒪᒃᑯᒃᑐᑦ ᐃᓄᐃᑦ ᑲᑎᒪᔨᕐᔪᐊᖏᑦ (ᐊᑕᐃᓐᓇᖅᑐᒥᒃ ᑐᓵᔭᖅᑐᕐᓯᒪᕙᒃᑐᑦ)
- ᐸᐅᒃᑑᑎᑦ ᐊᕐᓇᐃᑦ ᐃᓄᐃᑦ ᑲᓇᑕᒥ (ᐊᑕᐃᓐᓇᖅᑐᒥᒃ ᑐᓵᔭᖅᑐᕐᓯᒪᕙᒃᑐᑦ)
ᓱᓇᐅᒻᒪᑕ ᐃᓄᖕᓂᑦ ᐃᓱᒪᓕᐅᕈᑎᐅᓯᒪᔪᑦ, ᖁᑦᑎᖕᓂᖅᐹᑎᒍᑦ ᐱᐅᑦᓯᐊᖅᑐᓂᒃ ᐋᓐᓂᐊᖃᕐᓇᒋᑦᑐᓕᕆᓂᕐᒧᑦ ᑐᑭᓯᒋᐊᕐᕕᒃᓴᖁᑏᑦ?
ᑖᒃᑯᐊ ᐱᓕᕆᐊᖑᔪᑦ ᐱᔾᔪᑎᒋᓪᓗᒋᑦ, ᐃᓄᖕᓂᑦ ᐃᓱᒪᓕᐅᕈᑎᐅᓯᒪᔪᑦ ᑐᑭᓯᒋᐊᕐᕕᒃᓴᖁᑏᑦ ᑐᑭᓯᒋᐊᕐᕕᒃᓴᖁᑎᓂᒃ ᑲᑎᖅᓱᐃᓂᐅᕙᒻᒪᑕ ᓇᓗᓇᐃᖅᓯᔾᔪᑎᑎᒍᑦ ᐊᒻᒪᓗ ᐱᓕᕆᐊᖑᕙᓪᓕᐊᕙᓐᓂᖏᓂᒃ ᒪᓕᒃᑎᑕᐅᓪᓗᑎᒃ ᓈᒻᒪᒋᔭᐅᓯᒪᔪᓂᑦ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ ᐊᒻᒪᓗ ᑐᓴᖅᑎᑕᐅᓯᒪᓪᓗᑎᒃ ᑐᑭᓯᐅᒪᓂᕐᒥᒃᑎᒍᑦ ᐃᓱᒪᒋᔭᐅᔪᓂᑦ ᐃᓄᓐᓂᑦ ᐊᑐᓂ ᐊᕕᒃᑐᖅᓯᒪᓂᐅᔪᓂᑦ. ᖁᑦᑎᖕᓂᖅᐹᑎᒍᑦ ᐱᐅᑦᓯᐊᖅᑐᑦ ᑐᑭᓯᒋᐊᕐᕕᒃᓴᖁᑏᑦ ᑐᑭᓯᒋᐊᕐᕕᒃᓴᖁᑎᐅᒻᒪᑕ ᐃᒪᓐᓇᐃᑦᑑᓪᓗᑎᒃ:
- ᐊᑐᕐᓂᖃᕋᔭᖅᑐᓂᒃ ᐸᕐᓇᐅᑎᓕᐅᕐᓂᕐᒥ ᐃᑲᔪᖅᑐᐃᓯᒪᓂᐊᕐᓗᑎᒃ ᐃᓄᐃᑦ ᐋᓐᓂᐊᖃᕐᓇᒋᑦᑐᓕᕆᓂᕐᒧᑦ ᐊᒻᒪᓗ ᖃᓄᐃᖖᒋᑦᑎᐊᕐᓂᖏᓐᓄᑦ;
- ᐱᔾᔪᑎᖃᖅᑎᑕᐅᓪᓗᑎᒃ ᐋᓐᓂᐊᖃᕐᓇᒋᑦᑐᓕᕆᓂᕐᒧᑦ ᐱᓕᕆᐊᒃᓴᑲᓪᓚᐅᔪᓄᑦ ᐊᒻᒪᓗ ᐃᓄᐃᑦ ᐋᓐᓂᐊᖃᕐᓇᒋᑦᑐᓕᕆᓂᕐᒧᑦ ᓴᖖᒋᓂᖃᕐᕕᒋᔭᖏᓐᓄᑦ, ᐱᑕᖃᓕᖅᑎᑦᓯᔾᔪᑎᐅᓯᒪᔪᓄᑦ ᐃᓄᐃᑦ ᑲᔪᓰᓐᓇᕆᐊᕈᓐᓇᖅᐸᓐᓂᖏᓂᒃ ᐊᒃᓱᕈᕐᓇᖅᑐᒃᑰᕋᓗᐊᕈᑎᒃ;
- ᐋᖅᑭᒃᓱᐊᖑᓯᒪᔪᓄᑦ ᐱᓕᕆᓂᖃᕐᓗᐊᖅᓱᑎᒃ ᑐᑭᓯᒋᐊᕐᕕᒃᓴᖁᑎᓂᒃ ᑲᑎᖅᓱᐃᓂᕐᒥᓐᓂ ᐱᓕᕆᔾᔪᓯᐅᓯᒪᔪᓂᑦ, ᑐᑭᒧᐊᒍᑎᒃᓴᖃᖅᑎᑕᐅᓪᓗᑎᒃ ᐃᓄᐃᑦ ᖃᐅᔨᒪᓂᖏᓐᓂᑦ, ᐊᑐᕐᓂᖃᖅᑎᑕᖏᓐᓂᑦ, ᐊᒻᒪᓗ ᓯᓚᕐᔪᐊᓕᒫᒥᐅᓂ ᐃᓱᒪᔾᔪᓯᐅᔪᓄᑦ ᐊᒻᒪᓗ ᓄᑕᓂᖅᐹᖑᓪᓗᑎᒃ ᐋᓐᓂᐊᖃᕐᓇᒋᑦᑐᓕᕆᓂᕐᒧᑦ ᖃᐅᔨᓴᐃᔨᒻᒪᕇᑦ ᖃᐅᔨᓴᐃᕙᓐᓂᖏᓐᓂᑦ; ᐊᒻᒪᓗ,
- ᐊᔾᔨᒌᓐᓂᖃᖅᑎᑕᐅᔪᓂᒃ ᐱᓕᕆᓂᖃᕐᕕᐅᕙᓪᓕᐊᓂᐊᕐᓂᖏᓂ ᐊᒻᒪᓗ ᐊᕕᒃᑐᖅᓯᒪᓂᐅᔪᓂ.
ᖃᐅᔨᓴᐃᓂᕐᒥ ᐱᓕᕆᐊᖃᕈᓯᐅᔪᑦ ᐃᓚᖃᖅᑎᑕᐅᓪᓗᑎᒃ ᐃᓄᐃᑦ ᖃᐅᔨᒪᔭᖏᓂᒃ ᐊᒻᒪᓗ ᓯᓚᑦᑐᖅᓴᖅᕕᖕᒥᑦ ᖃᐅᔨᓴᐃᓂᐅᔪᓂᑦ, ᐊᑐᓕᖅᑎᑦᓯᓯᒪᓂᖏᑦ “ᐱᐅᓂᖅᐸᐅᔪᓂᒃ ᐱᐅᓯᖃᖃᑎᒌᖖᒋᑦᑐᑦ ᐱᓕᕆᔾᔪᓯᖏᓐᓂᑦ’ ᐋᖅᑮᓯᒪᓕᕐᓂᒃᓴᒧᑦ ᐱᓕᕆᔾᔪᑎᖃᕐᓗᐊᕋᔭᕐᓂᕐᒥ, ᐃᓄᖕᓄᑦ ᑐᕌᖓᑎᑕᐅᓯᒪᔪᓂᒃ, ᐊᒻᒪᓗ ᐱᑦᓯᐊᖅᑑᓪᓗᑎᒃ ᐱᓕᕆᓂᖃᕐᓂᖅᑎᒍᑦ ᐋᓐᓂᐊᖃᕐᓇᒋᑦᑐᓕᕆᓂᕐᒧᑦ ᖃᐅᔨᓴᐃᓂᐅᕙᒃᑐᓂ.
ᖃᓄᐃᑉᐱᑖ? ᑲᓇᑕᒥ ᐃᓄᐃᑦ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᖃᐅᔨᓴᖅᑎᖏᑦ (QNIHS) ᐅᓪᓗᒥᒧᑦ ᑎᑭᑎᑕᐅᓯᒪᔪᓂᒃ ᑐᓴᒐᒃᓴᖁᑎᓂᒃ ᑲᑎᖅᓱᐃᕙᓐᓂᐊᖅᑐᑦ ᐃᑲᔪᕈᑎᒃᓴᐅᓂᐊᖅᑐᓂᒃ ᐱᓕᕆᐊᒧᑦ ᐊᒻᒪᓗ ᒪᓕᒐᓕᐅᖅᑎᐅᔪᓄᑦ ᓄᓇᓕᐅᔪᑉ, ᐊᕕᒃᑐᖅᓯᒪᓂᐅᔪᑉ ᐊᒻᒪᓗ ᑲᓇᑕᐅᑉ ᖁᑦᑎᖕᓂᖏᓐᓃᖅᑐᑦ ᑐᑭᓯᐅᒪᓕᖅᐹᓪᓕᖁᓪᓗᒋᑦ ᖃᓄᖅ ᐃᓄᐃᑦ ᐋᓐᓂᐊᖃᕐᓇᒋᑦᑐᓕᕆᓂᕐᒧᑦ ᖃᓄᐃᓕᖓᓂᖏᑦ ᐊᓯᔾᔨᖅᐸᓪᓕᐊᓂᖃᕐᒪᖔᑕ ᐃᓚᖃᖅᑎᓪᓗᒋᑦ ᑐᑭᒧᐊᒍᑎᒃᓴᐅᓂᐊᖅᑐᓂᒃ ᐃᓄᐃᑦ ᐋᓐᓂᐊᖃᕐᓇᖖᒋᑦᑐᓕᕆᓂᕐᒥ ᐱᓕᕆᐊᓂᒃ ᐋᖅᑭᒃᓱᐃᓂᖏᓐᓂ. ᖃᐅᔨᒋᐊᕐᓂᕐᓂ ᑐᕌᖓᑎᑕᐅᕙᓐᓂᐊᖅᑐᑦ ᐃᓄᐃᑦ ᐋᓐᓂᐊᖃᕐᓇᒋᑦᑐᓕᕆᓂᕐᒧᑦ ᐊᒻᒪᓗ ᐃᓅᓯᓕᕆᓂᕐᒥ ᐃᓱᒪᓕᐅᖅᓯᒪᓕᕈᑎᐅᕙᒃᑐᓄᑦ ᐋᓐᓂᐊᖃᕐᓇᒋᑦᑐᓕᕆᓂᕐᒧᑦ, ᐃᓚᖃᖅᑎᓪᓗᒋᑦ ᐃᒡᓗᓕᕆᓂᕐᒧᑦ, ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕐᓂᕐᓄᑦ, ᐃᓱᒪᒃᑯᑦ ᖃᓄᐃᖖᒋᑦᓯᐊᕐᓂᓕᕆᓂᕐᒧᑦ, ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ, ᖃᓄᐃᓐᓇᖖᒋᑦᑐᒦᑎᑦᓯᓂᕐᓄᑦ ᐊᒻᒪᓗ ᒥᐊᓂᕆᔭᐅᓂᖏᓐᓄᑦ, ᐃᓕᓐᓂᐊᕐᓂᓕᕆᓂᕐᒧᑦ, ᑮᓇᐅᔭᓕᐅᕈᑎᐅᕙᒃᑐᓄᑦ, ᐊᓐᓇᐅᒪᔾᔪᑎᒃᓴᖃᖅᐸᓐᓂᕐᓄᑦ, ᐊᒻᒪᓗ ᐱᐅᓯᑐᖃᓕᕆᓂᕐᒥ ᐊᒻᒪᓗ ᐅᖃᐅᓯᓕᕆᓂᕐᒥ ᐱᓕᕆᐊᓄᑦ.
ᖃᐅᔨᒋᐊᕐᓂᕐᒥ ᖃᐅᔨᔭᐅᓯᒪᓕᖅᑐᑦ ᐃᓗᓕᖃᖅᐸᓐᓂᐊᖅᑐᑦ ᐃᓄᐃᑦ ᐋᓐᓂᐊᖃᕐᓇᒋᑦᑐᓕᕆᓂᕐᒧᑦ ᐊᒻᒪᓗ ᐃᓅᓯᓕᕆᓂᕐᒥ ᐃᓱᒪᓕᐅᕈᑎᐅᓯᒪᓕᓚᐅᖅᑐᓂᒃ ᐃᓄᖕᓂᑦ ᐊᒻᒪᓗ ᐊᑐᐃᓐᓇᐅᑎᑕᐅᓯᒪᓂᐊᕐᓗᑎᒃ ᐃᓄᖕᓄᑦ ᓯᕗᓪᓕᖅᐸᐅᑎᑕᐅᓗᑎᒃ. ᐃᓄᖕᓂᑦ