ᖃᓄᐃᑉᐱᑖ? ᑲᓇᑕᓕᒫᕐᒥ ᐃᓄᐃᑦ ᖃᓄᐃᓐᓂᖏᓐᓂᒃ ᖃᐅᔨᓴᕐᓂᖅ ᐊᐱᖅᓲᑎᒃᑯᑦ ᑲᔪᓰᓐᓇᖅᑐᒥᒃ ᐃᓄᓐᓄᑦ-ᓇᒻᒥᓂᕆᔭᐅᓪᓗᓂ ᐊᒻᒪᓗ ᐃᓄᓐᓄᑦ-ᐃᓱᒪᓕᐅᕈᑕᐅᓯᒪᓪᓗᓂ, ᖃᐅᔨᓴᕐᓂᖅ ᐊᐱᖅᓲᑎᒃᑯᑦ ᐃᓄᐃᑦ ᖃᓄᐃᓐᓂᖏᓐᓂᒃ ᖃᓄᐃᙱᑦᓯᐊᕋᓱᐊᖅᐸᓐᓂᖏᓐᓂᓪᓗ ᖃᐅᔨᓴᕐᓂᖃᖃᑦᑕᕐᓂᐊᖅᑐᑦ ᑕᓪᓕᒪᑦ ᐊᕐᕌᒍᑦ ᐊᓂᒍᕋᐃᑉᐸᑕ. ᓯᕗᓪᓕᖅᐹᖑᓪᓗᓂ ᑐᑭᓯᒋᐊᕈᑎᑦᓴᓂᒃ ᑲᑎᖅᓱᐃᓂᖃᓚᐅᖅᓯᒪᔪᑦ 2021ᒥ. ᖃᓄᐃᑉᐱᑖ? ᑲᓇᑕᓕᒫᕐᒥ ᐃᓄᐃᑦ ᖃᓄᐃᓐᓂᖏᓐᓂᒃ ᖃᐅᔨᓴᕐᓂᖅ ᐊᐱᖅᓲᑎᒃᑯᑦ ᑕᑯᑎᒃᓯᒋᐊᕐᓂᐊᖅᑐᖅ ᖃᓄᐃᓐᓂᖏᓐᓂᒃ ᖃᓄᐃᙱᑦᓯᐊᕋᓱᐊᖅᐸᓐᓂᖏᓐᓂᓪᓗ ᐃᓄᐃᑦ ᓄᓇᓕᖏᓐᓂ ᐊᕕᒃᑐᖅᓯᒪᔪᓕᒫᕐᓂ – ᓱᓇᐃᑦ ᐊᐅᓚᓂᖃᒃᓯᐊᖅᑲᑦ ᓇᐅᒃᑯᓪᓗ ᐱᕚᓪᓕᕆᐊᕆᐊᖃᖅᑲᑦ. ᓯᕗᓪᓕᖅᐹᕐᒥ, ᑲᓇᑕᓕᒫᕐᒥ ᖃᐅᔨᓴᕐᓂᖃᕐᓂᖅ ᑲᓱᖅᑎᕆᓂᐊᖅᑐᖅ ᐃᓄᖕᓂᒃ ᐃᓄᐃᑦ ᓄᓇᖓᓐᓃᒃᑐᑦ ᐱᓕᕆᖃᑎᒌᓐᓂᒃᑯᑦ. ᖃᓄᐃᑉᐱᑖ? ᑲᓇᑕᓕᒫᕐᒥ ᐃᓄᐃᑦ ᖃᓄᐃᓐᓂᖏᓐᓂᒃ ᖃᐅᔨᓴᕐᓂᖅ ᐊᐱᖅᓲᑎᒃᑯᑦ ᑐᑭᓯᒋᐊᕈᑎᒃᓴᓂᒃ ᑲᑎᖅᓱᐃᓂᖓᑦ ᐊᑐᖅᑕᐅᓂᐊᖅᑐᖅ ᓄᓇᓕᓕᒫᕐᓂᒃ ᐃᓄᕕᐊᓗᓐᓂ, ᓄᓇᕗᒻᒥ, ᓄᓇᕕᒻᒥ, ᐊᒻᒪᓗ ᓄᓇᑦᓯᐊᕗᒻᒥ.
ᓴᐳᑎᔭᐅᒃᓯᐊᖁᓪᓗᒋᑦ ᐱᔪᓐᓇᐅᑎᑎᑦ ᑲᙳᓇᖅᑐᖁᑎᑎᓪᓗ, ᖃᓄᐃᑉᐱᑖ? ᑲᓇᑲᓕᒫᕐᒥ ᐃᓄᐃᑦ ᐃᓗᓯᖏᓐᓂᒃ ᖃᐅᔨᓴᕐᓂᖅ ᐊᐱᖅᓲᑎᑎᒍᑦ ᐃᖅᑲᓇᐃᔭᖅᑎᖏᑦ ᐊᐱᕆᖅᑳᖃᒃᑕᕐᓂᐊᖅᑐᑦ ᐃᓱᒪᖅᓲᑎᒋᔭᕐᓂᑦ ᐊᖏᕋᓗᐊᕐᒪᖔᖅᐱᑦ ᐊᓯᓕᒫᑎᓪᓗ ᐱᖃᑕᐅᒍᒪᓂᕐᒧᑦ. ᑕᒪᓐᓇ ᖃᓄᖅ ᑐᕿᖃᖅᐸ ᐃᓕᖕᓄᑦ?
- ᑐᑭᓯᑎᑕᐅᒃᓯᐊᕐᓂᐊᖅᑐᑎᑦ ᐱᒡᔪᑎᖓᓂᑦ ᑕᒪᑐᒪ ᖃᐅᔨᓴᕐᓂᐅᑉ, ᐱᖃᓯᐅᓪᓗᒋᑦ ᐅᓗᕆᐊᓇᖅᑐᒦᒃᑎᒃᓯᑐᐃᓐᓇᕆᐊᖃᖅᑐᑦ ᐃᑲᔪᕐᓂᖃᑐᐃᓐᓇᕆᐊᖃᖅᑐᐃᓪᓗ, ᐱᖃᓯᐅᖕᒥᓗᒍ ᑲᙳᓇᖅᑑᑎᑕᐅᓂᖓ ᑕᒪᑐᒪ ᖃᐅᔨᓴᕐᓂᐅᑉ ᐊᐱᖅᓲᑎᑎᒍᑦ, ᓯᕗᓂᐊᒍᑦ ᐱᒋᐊᓚᐅᙱᓐᓂᖓᓂ,
- ᐅᑭᐅᑭᒃᑑᒍᕕᑦ, ᐊᖏᕐᓃᑦ ᐱᔭᐅᓂᐊᖅᑐᖅ ᐊᖏᔪᖅᑳᖕᓂᑦ ᐅᑉᕙᓘᓐᓃᑦ ᐸᖅᑭᔨᖕᓂᑦ. ᒪᒃᑯᒃᑑᒍᕕᑦ, ᐅᑭᐅᖃᕐᓗᑎᑦ 12ᓂᑦ ᐅᖓᑖᓂᓪᓗ, ᐊᐱᕆᔭᐅᓂᐊᕐᒥᔪᑎᑦ ᐊᖏᕐᒪᖔᖅᐱᑦ ᐱᖃᑕᐅᒍᒪᓂᕐᒧᑦ – ᐱᖃᑕᐅᒍᒪᙱᒍᓐᓇᖅᑐᑎᑦ ᐊᖏᔪᖅᑳᑦ ᐸᖅᑭᔩᓪᓘᖕᓃᑦ ᐊᖏᕐᓂᕋᓗᐊᕐᐸᑦ.
- ᐱᔪᓐᓇᐅᑎᖃᖅᑯᑎᑦ ᐊᓪᓗᕈᓐᓇᕐᓗᒍ ᐊᐱᖅᑯᑎᐅᔪᖅ ᑭᐅᒍᒪᙱᒃᑯᕕᐅᒃ. ᓄᖅᑲᐅᑎᒍᓐᓇᕐᒥᔭᐃᑦ ᐊᐱᖅᓲᑎ ᐊᑐᕈᓐᓃᖅᑎᓪᓗᒍᓪᓗ ᐊᖏᕐᓂᕆᓯᒪᔭᐃᑦ ᖃᖓᑐᐃᓐᓇᒃᑯᑦ.
- ᑐᑭᓯᕆᐊᕈᑎᒃᓴᐃᑦ ᑐᕌᖓᔪᑦ ᑭᓇᐅᓂᕐᒧᑦ ᓴᒃᑯᐃᔭᐅᓂᐊᙱᒃᑐᑦ ᓱᖅᑯᐃᕋᒃᓴᐅᓂᐊᕋᑎᓪᓗ ᓇᑭᖔᖅᓯᒪᒻᒪᖔᑕ. ᑖᒃᑯᓇᓂ ᖃᓄᐃᑉᐱᑖ? ᐱᓕᕆᖃᑎᒌᒃᑐᑦ ᐱᓕᕆᒃᓯᐊᕐᓂᖃᖅᑐᑦ ᓴᐳᑎᔭᐅᖁᓪᓗᒋᑦ ᑭᓇᐅᓂᕐᓅᖓᔪᑦ ᑲᑎᖅᓱᖅᑕᐅᔪᓂᓪᓗ ᑐᑭᓯᒋᐊᕈᑎᓂ.
ᐊᐱᖅᑯᑎᒃᓴᖃᕈᕕᑦ ᐱᒡᔪᑎᖓᓂᑦ ᐱᔪᓐᓇᐅᑎᒃᐱᑦ ᐱᖃᑕᐅᑎᓪᓗᑎᑦ ᖃᐅᔨᓴᕐᓂᐅᔪᒥ ᑐᓴᕆᐊᕐᕕᒋᓗᒋᑦ ᐃᓄᐃᑦ ᖃᐅᔨᓴᕐᕕᖓᑦ ᑲᓇᑕᓕᒫᕐᒥ ᑲᑎᒪᔨᕋᓛᖏᑦ, ᐅᕙᓂ 613-299-7522 ᐅᑉᕙᓘᓐᓃᑦ grable@itk.ca.
ᖃᓄᐃᑉᐱᑖ? ᑐᑭᖃᖅᑐᖅ “ᐊᑐᓂ ᖃᓄᐃᑉᐱᑖ?” ᑖᓐᓇ ᑕᐃᒎᓯᖅ ᐊᑐᖅᑕᐅᓚᐅᖅᓯᓯᒪᔪᖅ 2004ᒥ ᓄᓇᕕᒃ ᐃᓄᖏᑦ ᖃᐅᔨᓴᖅᑕᐅᑎᓪᓗᒋᑦ ᓂᕈᐊᖅᑕᐅᓯᒪᓪᓗᓂᓪᓗ ᐃᓘᓐᓇᖏᓐᓄᑦ ᐊᕕᒃᑐᖅᓯᒪᓂᐅᔪᓄᑦ ᑲᓇᑕᓕᒫᕐᒥ ᖃᐅᔨᓴᕈᑎᐅᓂᐊᖅᑎᓪᓗᒍ ᑐᕌᒐᖃᕐᒪᑦ ᐃᓚᖓᓐᓂ ᖃᐅᔨᓴᕈᑕᐅᓂᐅᓴᔪᒥ – ᑕᑯᑎᒃᓯᒋᐊᕐᓗᓂ ᖃᓄᐃᓐᓂᖏᓐᓂᒃ ᖃᓄᐃᙱᑦᓯᐊᕆᐊᖅᐸᓐᓂᖏᓐᓂᓪᓗ ᐃᓄᐃᑦ.
ᖃᓄᐃᑉᐱᑖ? ᑲᓇᑕᓕᒫᕐᒥ ᐃᓄᐃᑦ ᖃᓄᐃᓐᓂᖏᓐᓂᒃ ᖃᐅᔨᓴᕐᓂᖅ ᐊᐱᖅᓲᑎᒃᑯᑦ QNIHS ᑖᓐᓇᑑᓪᓗᓂ ᐃᓄᓐᓄᑦ-ᐊᐅᓚᑕᐅᔪᖅ ᖃᓄᐃᓐᓂᖏᓐᓂᒃ ᖃᐅᔨᓴᕐᓂᐅᓪᓗᓂ ᐃᓚᐅᑎᑦᓯᓪᓗᓂ ᐃᓄᓐᓂᒃ ᐅᑭᐅᖃᑎᒌᙱᑦᑐᓂᒃ ᓄᓇᓕᓕᒫᕐᓂᒃ ᐃᓄᐃᑦ ᓄᓇᖏᓐᓂ ᑎᓴᒪᐅᔪᓂᒃ ᐊᕕᑦᑐᖅᓯᒪᔪᓃᑦᑐᓂ. ᑖᓐᓇ ᐱᓕᕆᐊᖑᔪᖅ ᑲᑎᖅᓱᐃᓂᐊᖅᑐᖅ ᒫᓐᓇᓕᑕᐅᔪᓂᒃ ᑐᑭᓯᒋᐊᕈᑎᑦᓴᓂᒃ ᐱᔭᐅᒋᐊᓕᓐᓂᒃ ᓄᓇᓕᓐᓄᑦ, ᐃᓄᐃᑦ ᑎᒥᖏᓐᓄᑦ ᐊᕕᑦᑐᖅᓯᒪᔪᓃᑦᑐᓂ ᐊᓯᖏᓐᓄᓪᓗ ᑐᑭᓯᒪᓂᖅᓴᐅᖁᓪᓗᒋᑦ ᐃᓄᐃᑦ ᖃᓄᐃᙱᔾᔪᑎᒋᕙᑦᑕᖏᓐᓂᒃ ᐊᑦᓱᕉᑎᒋᕙᑦᑕᖏᓐᓂᓪᓗ ᐊᕕᑦᑐᖅᓯᒪᔪᓃᑦᑐᓂ ᑲᓇᑕᓕᒫᕐᒥᓪᓗ.
ᐃᓄᐃᑦ ᐊᐱᕆᔭᐅᕙᑦᑐᑦ ᐃᓚᐅᖁᔭᐅᓪᓗᑎᑦ ᐊᒥᓱᓂᒃ ᖃᐅᔨᓴᕐᓂᐅᔪᓂ ᐊᐱᖅᓲᑎᒃᑯᑦ. ᐃᓚᖏᑦ ᐊᐅᓚᐅᑕᕙᑦᑐᑦ ᒐᕙᒪᑐᖃᒃᑯᓐᓄᑦ, ᓯᓚᑦᑐᓴᕐᕕᓐᓄᑦ ᐊᓯᖏᓐᓄᓪᓗ. ᐊᒥᓲᓂᖅᓴᐃᑦ ᖃᐅᔨᓴᕐᓃᑦ ᐊᐱᖅᓲᑎᒃᑯᑦ ᐱᓕᕆᐊᖑᓯᒪᕙᙱᑦᑐᑦ ᐃᓄᓐᓄᑦ. ᐊᐱᖅᑯᑎᐅᔪᑦ ᐊᑑᑎᖃᓗᐊᖅᐸᒐᑎᓪᓗ ᐃᓄᓐᓄᑦ ᐱᔾᔪᑎᖃᖅᐸᒐᑎᓪᓗ ᓯᕗᓪᓕᐅᑎᒍᒪᔭᑦᑎᓐᓂ. ᐊᐱᖅᑯᑎᐅᔪᑦ ᐱᔾᔪᑎᖃᕐᓂᐊᖅᑐᑦ ᐅᖃᖃᑎᒌᒍᑕᐅᓯᒪᔪᓂᒃ ᐃᓄᓐᓄᑦ ᓯᕗᓪᓕᐅᑎᒍᒪᔭᖏᓐᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ. ᐃᓘᓐᓇᑎᑦ ᑐᑭᓯᒋᐊᕈᑎᐅᔪᑦ ᐊᐅᓚᑕᐅᓂᐊᖅᑐᑦ ᐃᓄᓐᓄᑦ. ᐱᖃᓯᐅᑎᓗᒍ, ᐃᓚᖓᑦ ᑐᕌᒐᕆᔭᑦᑕ ᖃᐅᔨᓴᕐᓂᕐᒥ ᐊᐱᖅᓲᑎᒃᑯᑦ ᐱᓕᒻᒪᑦᓴᐃᒍᒪᓪᓗᑕ ᐱᕕᑕᖃᕆᐊᖅᑎᑦᓯᓗᑕᓗ ᐊᑐᖅᑕᐅᒍᓐᓇᖅᑐᓂᒃ ᐱᓕᕆᐊᖃᖅᐸᓪᓕᐊᓂᕐᒧᑦ ᐱᔪᓐᓇᕐᓂᖃᓕᕐᓗᑎᑦ ᐃᓄᐃᑦ ᐊᐅᓚᑦᓯᓗᑎᑦ ᓇᒻᒥᓂᖅ ᖃᐅᓕᓴᕐᓂᕐᒥᒃ ᐊᐱᖅᓲᑎᒃᑯᑦ ᐱᑕᖃᐃᓐᓇᖅᐸᑦᑐᓂ, ᑲᔪᓰᓐᓇᖅᑐᓂ. ᑕᒪᓐᓇ ᐃᑲᔪᖅᓯᔪᖅ ᐃᓄᐃᑦ ᐊᐅᓚᑦᓯᓂᖅᓴᐅᓕᖅᑎᓪᓗᒋᑦ ᖃᐅᔨᓴᖅᑐᓕᕆᓂᕐᒥᒃ ᐊᐱᖅᓲᑎᒃᑯᑦ ᖃᐅᔨᓴᕐᓂᕐᒨᖓᔪᐃᓪᓗ ᖃᐅᔨᒪᔭᐅᒋᐊᓖᑦ ᐃᖅᑲᓇᐃᔮᑦᓴᐃᓪᓗ ᐃᓄᐃᑦ ᓄᓇᖏᓐᓃᖏᓐᓇᖁᓪᓗᒋᑦ.
ᑐᑭᓯᒋᐊᕈᑎᑦᓴᓪᓗᐊᑕᐅᔪᑦ ᖃᓄᐃᓐᓂᖏᓐᓂ ᐃᓄᐃᑦ ᐱᑐᖃᐅᓗᐊᓕᖅᑐᑦ ᓱᓕᓪᓚᕆᙱᑦᑐᒥᓪᓗ ᓴᖅᑭᖅᑎᑕᐅᓯᒪᓪᓗᑎᑦ ᐃᓄᐃᑦ ᖃᓄᐃᓐᓂᖏᓐᓂᒃ ᖃᓄᐃᙱᑦᓯᐊᕆᐊᖅᐸᓐᓂᖏᓐᓂᓪᓗ. ᖃᓄᐃᑉᐱᑖ? ᑲᓇᑕᓕᒫᕐᒥ ᐃᓄᐃᑦ ᖃᓄᐃᓐᓂᖏᓐᓂᒃ ᖃᐅᔨᓴᕐᓂᖅ ᐊᐱᖅᓲᑎᒃᑯᑦ ᑲᑎᖅᓱᐃᓂᐊᖅᑐᖅ ᒫᓐᓇᓕᑕᕐᓂᒃ ᑐᑭᓯᒋᐊᕈᑎᑦᓴᓂᒃ ᐱᔭᐅᒋᐊᓕᓐᓂᒃ ᓄᓇᓕᓐᓄᑦ, ᐊᕕᑦᑐᖅᓯᒪᔪᓃᑦᑐᓂ ᐃᓄᐃᑦ ᒐᕙᒪᖏᓐᓄᑦ ᐊᓯᖏᓐᓄᓪᓗ ᑐᑭᓯᒪᓂᖅᓴᐅᖁᓪᓗᒋᑦ ᐃᓄᐃᑦ ᐊᑦᓱᕉᑎᒋᕙᑦᑕᖏᓐᓂᒃ. ᖃᐅᔨᓴᕐᓂᖅ ᐊᐱᖅᓲᑎᒃᑯᑦ ᑐᑭᓯᒋᐊᖅᑎᑦᓯᒍᓐᓇᖅᑐᖅ ᐃᑲᔪᕈᑕᐅᓗᓂ ᐱᕙᓪᓕᐊᑎᑕᐅᓂᖏᓐᓂ ᐱᓕᕆᐊᑦᓴᐃᑦ ᐊᕕᑦᑐᖅᓯᒪᔪᓃᑦᑐᓂ ᑐᕌᖓᖃᖅᑐᓂᒃ ᐱᕚᓪᓕᕆᐊᖅᑎᑦᓯᓂᕐᒥ ᐃᓗᓯᖏᓐᓂ ᐃᓄᐃᑦ, ᐃᓚᑦᑕ ᓄᓇᓕᑦᑕᓪᓗ.
ᐊᑐᓂ ᓄᓇᓕᓕᒫᕐᓂ, ᖃᒃᓯᒐᓚᐃᑦ ᐃᓄᐃᑦ ᐅᑭᐅᖃᑎᒌᙱᒃᑐᑦ ᐊᐱᕆᔭᐅᓂᐊᖅᑐᑦ ᐃᓚᐅᖃᑕᐅᒍᒪᖕᒪᖔᑕ ᖃᐅᔨᓴᕐᓂᕐᒥ ᐊᐱᖅᓲᑎᒃᑯᑦ. ᐃᓚᐅᖃᑕᐅᔪᒃᓴᐃᑦ ᓂᕈᐊᖅᑕᐅᖃᒃᑕᕐᓂᐊᖅᑐᑦ ᓇᓪᓕᑐᐃᓐᓇᖏᑦ ᒪᓕᓪᓗᒋᑦ ᓄᓇᓕᖕᓂ ᑎᑎᖅᑕᐅᓯᒪᔪᑦ ᐊᕕᒃᑐᖅᓯᒪᓪᓗᑎᑦ ᐅᑭᐅᖃᑎᒌᙱᓐᓂᖏᓐᓄᑦ ᐊᖑᑕᐅᓂᖏᓐᓄᓪᓗ ᐊᕐᓇᐅᓂᖏᓐᓄᓪᓘᓐᓃᑦ. ᐱᖃᑕᐅᓂᐊᖅᑐᓂᑦ ᓴᖅᑭᑎᒃᓯᒐᓱᒃᑐᒍᑦ ᑭᒡᒐᖅᑐᐃᔪᓂᑦ ᖃᓄᐃᒃᑐᑐᐃᓐᓇᕐᓂᑦ ᐃᓄᖕᓂᑦ ᓄᓇᖃᖅᑐᓂ. ᑭᐅᒡᔪᑕᐅᓯᒪᔪᓂᑦ ᓴᖅᑭᖅᑎᑕᐅᓂᐊᖅᑐᑦ ᑭᒡᒐᖅᑐᐃᒃᓯᐊᖁᓪᓗᒋᑦ ᐃᓄᖕᓂᑦ ᓄᓇᖃᖅᑐᓂᑦ ᐊᕕᒃᑐᖅᓯᒪᓂᕐᒥ, ᑕᐃᒃᑯᐊᑐᐊᖅ ᓇᓪᓕᑐᐃᓐᓇᖏᒍᑦ ᓂᕈᐊᖅᑕᐅᓂᓖᑦ ᐱᖃᑕᐅᒍᓐᓇᖅᑐᑑᔪᑦ. ᐱᖃᑕᐅᓂᖅ ᐃᓱᒪᖅᓲᑕᐅᒃᓯᐊᕋᓗᐊᖅᑎᓪᓗᒍ, ᐱᖃᑕᐅᓂᒃᑯᑦ, ᓂᕈᐊᖅᑕᐅᒍᕕᑦ, ᐃᑲᔪᕐᓂᐊᖅᑐᑎᑦ ᐅᓂᒃᑲᐅᓯᖃᒃᓯᐊᕐᓂᕐᒥ ᐃᓄᐃᑦ ᖃᓄᐃᓐᓂᕆᔭᖏᓐᓂᑦ ᐃᓗᓯᖏᑦᑎᒍᑦ ᐃᓱᒪᖏᒃᑎᒍᓪᓗ ᑕᒪᓐᓇᓗ ᑐᑭᖃᖅᑐᓂ ᓯᕗᓂᒃᓴᑎᓐᓂ ᐱᓕᕆᐊᒃᓴᐅᔪᑦ ᐊᑐᐊᒐᐃᓪᓗ ᐊᒃᑐᐃᓂᖃᖅᑐᑦ ᐃᓄᖕᓂᑦ ᑭᒡᒐᖅᑐᐃᒃᓯᐊᕐᓂᖅᓴᐅᓂᐊᕐᒪᑕ ᐃᓄᐃᑦ ᐱᒍᒋᐊᓕᖏᓐᓂᑦ ᓯᕗᓕᐅᑎᒍᒪᔭᖏᓐᓂᓪᓗ.
ᑐᑭᓯᒋᐊᕈᑎᑦᓴᐃᑦ ᑲᑎᖅᓱᖅᑕᐅᓯᒪᔪᑦ ᐊᑐᖅᑕᐅᓂᐊᖅᑐᑦ ᐊᒥᓱᓂᒃ ᐱᔾᔪᑎᖃᕐᓗᑎᑦ ᐱᖃᓯᐅᓪᓗᒋᑦ ᐸᕐᓇᐅᑎᓕᐅᕐᓂᖅ, ᑐᑭᓯᒋᐊᕈᑎᑦᓴᐅᓗᑎᑦ ᐊᑐᐊᒐᓕᐅᕐᓂᕐᒧᑦ ᑐᑭᑖᕈᑕᐅᕙᑦᑐᓂ, ᐱᕚᓪᓕᕆᐊᖅᑕᐅᓗᑎᑦ ᐱᓕᕆᐊᑦᓴᐃᑦ ᐱᓕᕆᐊᖑᕙᓪᓕᐊᓗᑎᓪᓗ ᓄᑖᑦ ᐱᓕᕆᐊᑦᓴᐃᑦ ᐱᒋᐊᖃᕈᑎᑦ. ᑐᖏᓕᕇᑦᑐᓂ ᖃᓄᐃᑉᐱᑖ ᖃᐅᔨᓴᕐᓃᑦ ᐊᐱᖅᓲᑎᒃᑯᑦ ᐊᑐᖅᑕᐅᖃᑦᑕᕐᓂᐊᖅᑐᑦ ᑕᓪᓕᒪᑦ ᐊᕐᕌᒍᐃᑦ ᐊᓂᒍᕋᐃᑉᐸᑕ, ᑕᑯᔪᓐᓇᖅᑎᑦᓯᓗᑎᑦ ᐃᓄᐃᑦ ᐊᕕᑦᑐᖅᓯᒪᔪᖏᓐᓂ, ᑐᑭᑖᖅᑎᐅᕙᑦᑐᓂᓪᓗ ᐱᓕᕆᐊᑦᓴᓂᒃ, ᐊᑐᐊᒐᕐᓂᒃ ᑐᑭᑖᕈᑎᐅᔪᓂᓪᓗ, ᑕᑯᑎᑦᓯᒍᓐᓇᕐᓗᓂ ᖃᓄᖅ ᐃᓄᐃᑦ ᖃᓄᐃᓐᓂᖏᑦ ᐊᓯᔾᔨᐸᓪᓕᐊᓂᖃᕐᒪᖔᑕ ᓇᐅᒃᑯᓪᓗ ᐱᕚᓪᓕᕆᐊᕈᑎᑦᓴᐃᑦ ᑮᓇᐅᔭᖃᖅᑎᑕᐅᒋᐊᖃᕐᒪᖔᑕ.
ᖃᓄᐃᑉᐱᑖ? ᑲᓇᑕᓕᒫᕐᒥ ᐃᓄᐃᑦ ᖃᓄᐃᓐᓂᖏᓐᓂᒃ ᖃᐅᔨᓴᕐᓂᖅ ᐊᐱᖅᓲᑎᒃᑯᑦ QNIHS ᐱᓕᕆᐊᖃᓪᓚᕆᑦᑐᖅ ᐃᖅᑲᓇᐃᔭᖅᑎᑦᓯᒍᒪᓪᓗᑎᑦ ᐃᓄᐃᑦ ᓄᓇᖏᓐᓂ ᐊᕕᑦᑐᖅᓯᒪᔪᓂ ᖃᐅᔨᓴᕐᓂᒃᑯᑦ ᓇᒻᒥᓂᕆᓗᒋᑦ, ᐊᐅᓚᓪᓗᒋᑦ, ᖃᐅᔨᒋᐊᖃᑦᑕᕐᓗᒋᑦ, ᐊᒥᖅᑳᒍᓐᓇᖅᑐᒋᑦ ᐊᑐᕐᓗᒋᓪᓗ ᑲᑎᖅᓱᖅᑕᐅᓯᒪᔪᑦ ᑐᑭᓯᒋᐊᕈᑏᑦ. ᐃᓄᐃᑦ ᑎᒥᖏᑦ ᓴᓇᕙᓪᓕᐊᔪᑦ ᖃᐅᔨᓴᕐᓂᖃᕐᓂᐊᖅᑐᑎᓪᓗ, ᖃᐅᔨᒋᐊᖃᑦᑕᕐᓗᒋᑦ ᐊᒥᖅᑳᒍᑎᒋᓪᓗᒋᓪᓗ ᓄᐊᑕᐅᓯᒪᔪᑦ, ᐊᒻᒪᓗ ᐊᑐᖅᑕᐅᓂᐊᖅᑐᑦ ᓴᖅᑭᑕᐅᓯᒪᔪᑦ ᑐᑭᓕᐅᕈᑕᐅᓗᑎᑦ ᐊᑐᐊᒐᕐᓄᑦ ᐱᓕᕆᐊᑦᓴᕐᓄᓪᓗ ᐱᕚᓪᓕᕆᐊᕆᒍᒪᓪᓗᑎᑦ ᐃᓗᓯᖏᓐᓂᒃ ᖃᓄᐃᙱᑦᓯᐊᕆᐊᖅᐸᓐᓂᖏᓐᓂᓪᓗ ᐃᓄᐃᑦ.
ᑖᓐᓇ ᖃᐅᔨᓴᕐᓂᖅ ᐊᐱᖅᓲᑎᒃᑯᑦ ᐃᓱᒪᖅᓲᑎᐅᔪᖅ ᑭᓯᐊᓂᓕ ᐱᒻᒪᕆᐊᓘᔪᖅ ᐃᓚᐅᖃᑕᐅᓂᖅ ᖃᐅᔨᓴᕐᓂᕐᒥᒃ ᐊᐱᖅᓲᑎᒃᑯᑦ. ᑕᐃᒪᐃᒍᓂ, ᑐᑭᓯᒋᐊᕈᑏᑦ ᐱᓯᒪᔪᑦ ᖃᐅᔨᓴᕐᓂᕐᒥᒃ ᓱᓕᓂᖃᑦᓯᐊᕐᓂᐊᕐᒪᑕ ᐱᒍᓐᓇᕐᓂᓕᒫᖓᓄᑦ. ᓱᓕᙱᑦᑐᓂᒃ ᑐᑭᓯᒋᐊᕈᑎᖃᕐᓂᖅ ᖃᓄᐃᓪᓚᕆᓐᓂᖏᓐᓂᒃ ᐃᓄᐃᑦ ᓄᓇᖏᓪᓗ, ᐱᔭᕆᐊᑐᓂᖅᓴᐅᕙᑦᑐᖅ ᐱᓕᕆᐊᖃᕋᓱᐊᕐᓂᖅ ᐊᑐᓕᖅᑎᒃᓯᓂᕐᓗ ᐱᓕᕆᐊᒃᓴᓂᒃ ᐊᑐᐊᒐᕐᓂᓪᓗ ᐱᕚᓪᓕᕆᐊᕈᑕᐅᒐᓱᐊᕈᓐᓇᖅᑐᓂᒃ ᐃᓗᓯᓕᕆᓂᒃᑯᑦ ᖃᓄᐃᙱᑦᓯᐊᕆᐊᕐᓂᒃᑯᓪᓗ ᐃᓄᓐᓄᑦ. ᑐᑭᓯᒋᐊᕈᑏᑦ ᓄᐊᑕᐅᔪᑦ ᐊᐱᖅᓱᖅᑕᐅᔪᓂ ᐱᒻᒪᕆᐅᔪᖅ ᓇᓗᓇᐃᖅᓯᒍᑕᐅᖁᓪᓗᒍ ᖃᓄᐃᓐᓂᕆᔭᖏᓐᓂᒃ ᐃᓄᐃᑦ ᓄᓇᖏᓐᓂ ᐊᕕᑦᑐᖅᓯᒪᔪᓂ.
ᐃᓗᓯᓕᕆᓂᕐᒨᖓᔪᑦ ᓯᕗᓪᓕᐅᑎᑕᐅᒍᒪᓯᒪᔪᑦ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ. ᑖᒃᑯᐊ ᓯᕗᓪᓕᐅᑎᑕᐅᒍᒪᔪᑦ ᐊᑐᖅᑕᐅᔪᑦ ᑐᑭᑖᕈᑕᐅᓪᓗᑎᑦ ᓇᓪᓕᖏᓐᓂᒃ ᐊᐱᖅᑯᑎᖃᕆᐊᖃᕐᒪᖔᑕ. ᐊᐱᖅᑯᑎᐅᔪᑦ ᐱᔾᔪᑎᖃᕐᓂᐊᖅᑐᑦ ᐊᒥᓱᓂᒃ ᐅᖃᐅᓯᒃᓴᐅᔪᓂᒃ ᐱᖃᓯᐅᓪᓗᒋᑦ ᓂᕿᓕᕆᓂᖅ ᓂᕆᖃᑦᑕᑦᓯᐊᕐᓂᕐᓗ, ᐃᓱᒪᒃᑯᑦ ᖃᓄᐃᙱᒋᐊᕈᑕᐅᕙᑦᑐᑦ, ᓱᕐᕋᓇᖅᑐᓂᒃ ᐊᑐᖃᑦᑕᕐᓂᖅ, ᐃᓕᖅᑯᓯᓕᕆᓂᖅ ᑭᓇᐅᓂᕐᓗ, ᐊᓯᖏᓪᓗ. ᐃᓄᐃᑦ ᐅᖃᖅᓯᒪᔪᑦ ᑕᑯᒍᒪᓪᓗᑎᑦ ᐊᐱᖅᑯᑎᐅᔪᓂᒃ ᓴᙱᓂᖏᓐᓂᒃ ᓄᓇᓕᖏᑦᑕ ᓴᖅᑭᑎᑦᓯᒋᐊᕈᒪᓪᓗᑎᑦ. ᑲᑎᖅᓱᖅᑕᐅᓯᒪᔪᑦ ᐱᒻᒪᕆᐅᑎᓪᓗᒋᑦ ᐃᓄᐃᑦ ᐊᑦᓱᕉᑎᒋᕙᑦᑕᖏᓐᓂᒃ, ᓴᙱᓂᖃᕐᓂᐅᔪᓂ ᐊᐱᖅᑯᑎᖃᕆᐊᖃᕐᒥᔪᖅ ᓇᓕᒧᒌᓕᖅᑎᒋᐊᕐᓗᒍ ᐱᐅᓂᖏᓪᓗ ᓴᖅᑭᑎᒋᐊᕐᓗᒋᑦ ᐃᓄᑦᑎᓐᓂ ᓄᓇᓕᑦᑎᓐᓄᓪᓗ.
ᑖᒃᑯᓂᖓᑦᓴᐃᓐᓇᖅ ᐊᐱᖅᑯᑎᖃᕐᓂᐊᖅᑐᖅ ᐃᓘᓐᓇᖏᓐᓄᑦ ᐊᕕᑦᑐᖅᓯᒪᔪᓃᑦᑐᓂ, ᐱᑎᑦᓯᓚᕿᓗᓂ ᐃᓄᐃᑦ ᓄᓇᖏᓐᓂ ᐊᕕᑦᑐᖅᓯᒪᔪᓂ ᑐᑭᓯᒋᐊᕈᑎᑦᓴᓂᒃ ᖃᐅᔨᓴᕈᑎᒋᓗᒋᑦ ᐊᓯᔾᔨᐸᓪᓕᐊᓂᐅᔪᓂ ᐱᓇᐃᓗᓗᑕᐅᓗᐊᖅᐸᑦᑐᓂ. ᑭᓯᐊᓂᓕ, ᐊᑐᓂ ᐊᕕᑦᑐᖅᓯᒪᔪᐃᑦ ᐋᖅᑭᒋᐊᕆᒍᓐᓇᕐᓂᐊᖅᑐᖅ ᐃᓚᒋᐊᕆᒍᓐᓇᕐᓗᑎᑦ ᐊᐱᖅᑯᑕᐅᖁᔭᕐᒥᓂ ᓯᕗᓪᓕᐅᑎᑕᐅᖁᔭᒥᓐᓄᑦ. ᑖᒃᑯᐊ ᑐᕌᖓᔪᑦ ᐊᕕᑦᑐᖅᓯᒪᔪᓃᑦᑐᓂ ᐱᑎᑦᓯᒍᓐᓇᕐᓂᐊᖅᑐᖅ ᐃᓄᐃᑦ ᓄᓇᓕᖏᑦ ᐊᕕᑦᑐᖅᓯᒪᔪᓂ ᑕᑯᒍᓐᓇᕐᓗᑎᑦ ᐱᓇᐃᓗᑕᕆᔭᒥᓐᓂ ᑐᕌᖓᔪᓂ ᐊᕕᑦᑐᖅᓯᒪᕕᖏᓐᓄᑦ.
ᖃᓄᐃᑉᐱᑖ? ᑲᓇᑕᓕᒫᕐᒥ ᐃᓄᐃᑦ ᖃᓄᐃᓐᓂᖏᓐᓂᒃ ᖃᐅᔨᓴᕐᓂᖅ ᐊᐱᖅᓲᑎᒃᑯᑦ QNIHS ᕿᒥᕐᕈᔭᐅᓪᓚᕆᓐᓂᐊᖅᑐᖅ ᐊᑐᖅᑕᐅᒋᐊᖃᕐᓂᖏᓐᓂᒃ ᓯᕗᓂᐊᒍᑦ ᖃᑎᑦᓱᐃᒋᐊᙱᓐᓂᖏᓐᓂ. ᕿᒥᕐᕈᒋᐊᕐᓂᖅ ᐊᑐᖅᑕᐅᒋᐊᖃᕐᓂᖏᓐᓂ ᑐᑭᖃᖅᑐᖅ ᐸᕐᓇᑕᐅᓯᒪᔪᑦ ᖃᐅᔨᓴᕐᓂᕐᒥ ᕿᒥᕐᕈᓴᐅᓯᒪᑦᓯᐊᖅᑐᓂᒃ ᐱᐅᔪᒥᒃ ᐊᑦᑐᐃᓂᖃᕐᓂᐊᕋᓗᐊᕐᒪᖔᑦ, ᐊᑦᑐᐃᓂᕐᓗᖁᓇᒍ ᐃᓚᐅᖃᑕᐅᔪᒥᒃ. ᖃᐅᔨᓴᕐᓂᕐᒧᑦ ᕿᒥᕐᕈᒋᐊᕐᓂᖅ ᐊᑐᖅᑕᐅᕙᑦᑐᖅ ᓴᐳᑎᖁᓪᓗᒋᑦ ᐃᓚᐅᖃᑕᐅᔪᐃᑦ ᑲᙳᓇᖅᑐᖁᑎᖏᓐᓂᒃ, ᖃᐅᔨᓴᕐᓂᐅᔪᖅ ᐱᓂᕐᓗᓐᓂᖃᖁᓇᒍ ᓇᐅᒃᑯᑐᐃᓐᓇᖅ, ᖃᐅᔨᓴᕐᓂᐅᔪᖅ ᐃᑲᔪᕐᓂᖃᕆᐊᖃᕐᓂᖓᓂᒃ ᐃᓚᐅᖃᑕᐅᔪᓄᑦ ᓄᓇᓕᖏᓐᓄᓪᓗ, ᐊᑭᖃᙱᑦᑐᒥᒃ, ᑐᓴᖅᑎᑕᐅᓯᒪᒌᕐᓗᑎᖅ ᑐᑭᓯᑎᐅᓯᒪᓗᑎᑦ ᐊᖏᕐᓂᖏᓐᓄᑦ ᐃᓚᐅᖃᑕᐅᓂᕐᒧᑦ, ᐱᐅᓂᖅᐹᒃᑯᓪᓗ ᐊᑐᕆᐊᖅᑕᐅᕙᑦᑐᓂ ᑲᙳᓇᖅᑐᓕᕆᓂᕐᒨᖓᔪᓂᒃ.
ᑮᓇᐅᔭᖃᖅᑎᑕᐅᓂᖅ ᐱᓯᒪᔪᖅ ᒐᕙᒪᑐᖃᒃᑯᓐᓂᒃ. ᐱᓕᕆᕕᖓ ᓄᓇᖃᖅᑳᖅᓯᒪᔪᓂ ᐱᔨᑦᑎᕋᕐᓂᕐᒧᑦ ᑲᓇᑕᒥ ᑐᓂᓯᓯᒪᔪᑦ $82 ᒥᓕᔭᓐᓂᒃ ᐊᑐᖅᑕᐅᔪᑦᓴᒫᕐᓂᒃ ᐊᕐᕌᒍᕐᓄᑦ ᖁᓕᓄᑦ, ᐃᓚᒋᐊᖅᑕᐅᖃᑦᑕᓛᖅᑎᓪᓗᒍ $6 ᒥᓕᔭᓐᓂᒃ ᐊᕐᕌᒍᑕᒫᑦ ᓯᕗᒧᐊᑉᐸᓪᓕᐊᓂᖓᓂ, ᖃᐅᔨᓴᕐᓂᐅᔪᖅ ᐊᐱᖅᓲᑎᒃᑯᑦ ᐊᑕᐃᓐᓇᖁᓪᓗᒍ ᓯᕗᓂᑦᓴᑎᓐᓂ.
ᖃᐅᔨᓴᕐᓃᑦ ᐊᐱᖅᓲᑎᒃᑯᑦ ᐊᑭᑐᔪᒻᒪᕆᐅᔪᑦ, ᐱᓗᐊᖅᑐᒥ ᐅᖓᓯᑦᑐᒦᑦᑎᓪᓗᒋᑦ ᐃᓄᐃᑦ ᓄᓇᓕᖏᑦ. ᐆᑦᑑᑎᒋᓗᒍ, ᐊᑭᑐᔪᒻᒪᕆᐅᔪᑦ ᖃᐅᔨᓴᖅᑏᑦ ᐊᐱᖅᓲᑎᒃᑯᑦ ᖃᖓᑦᑕᐅᑎᖏᑦ, ᑐᔪᕐᒥᒍᑎᖏᓪᓗ ᓄᓇᓕᓐᓂ; ᑮᓇᐅᔾᔭᓵᖏᑦ ᐊᐱᖅᓱᖅᑏᑦ, ᓄᓇᓕᓐᓂ ᑐᓴᐅᒪᑎᑦᓯᔩᑦ, ᐋᓐᓂᐊᓯᐅᖅᑏᑦ ᐊᓯᖏᓪᓗ ᐊᑭᑦᑐᕈᔾᔨᕙᑦᑐᑦ; ᐊᒻᒪᓗ ᐊᑭᑐᒋᓪᓗᓂ ᖃᕆᑕᐅᔭᒃᑰᕈᑎᖏᑦ ᐱᓕᕆᐊᖑᒋᐊᖃᕐᓂᖏᓐᓄᑦ ᑲᑎᖅᓱᐃᒍᑕᐅᒍᓐᓇᖅᑐᓂᒃ ᐸᐸᓪᓗᒋᓪᓗ ᑲᑎᖅᓱᖅᑕᐅᔪᑦ. ᓯᕗᓂᐊᒍᑦ ᒐᕙᒪᒃᑯᓐᓂ ᑐᑭᑖᖅᑎᐅᕙᑦᑐᑦ, ᐱᓕᕆᐊᑦᓴᓂᒃ ᓴᓇᔨᐅᕙᑦᑐᑦ ᐊᒻᒪᓗ ᐊᕕᑦᑐᖅᓯᒪᔪᓂ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐱᓕᕆᔨᐅᐅᔪᑦ ᐱᕚᓪᓕᕆᐊᖅᑎᑦᓯᙱᓐᓂᖏᓐᓂ, ᑐᑭᓯᒋᐊᕈᑎᑦᓴᓪᓚᕆᓐᓂᒃ ᐱᓯᒪᒋᐊᓖᑦ ᑐᑭᑖᑦᓯᐊᕈᓐᓇᖁᓪᓗᒋᑦ. ᖃᐅᔨᒪᒋᐊᓖᑦ ᖃᓄᐃᓐᓂᖏᓐᓂᒃ ᐃᓄᐃᑦ, ᖃᓄᐃᑦᑐᑦ ᑲᔪᓯᓂᖃᑦᓯᐊᕐᓂᖏᑦ, ᖃᓄᐃᑦᑐᑦ ᖃᓄᐃᙱᑦᓯᐊᕆᐊᕈᑕᐅᕙᒻᒪᖔᑕ ᓇᐅᒃᑯᓪᓗ ᐱᕚᓪᓕᕆᐊᖃᕐᒪᖔᑦ ᐱᓯᒪᔭᐅᒋᐊᖃᓲᑦ. ᑲᑎᖅᓱᖅᑕᐅᔪᑦ ᑕᒪᑐᒪᓂ ᑲᓇᑕᓕᒫᕐᒥ ᖃᐅᔨᓴᕐᓂᐅᔪᒥ ᑕᑯᑎᑦᓯᓂᐊᖅᑐᖅ ᑕᑯᒋᐊᓕᖏᓐᓂᒃ ᐱᓕᕆᐊᖃᖁᓪᓗᒋᑦ ᐱᓕᕆᐊᑦᓴᓂᒃ ᑐᕌᒐᕆᔭᐅᒍᒪᔪᓂᓪᓗ.
ᖃᐅᔨᓴᕐᓂᖅ ᐊᐱᖅᓲᑎᒃᑯᑦ ᐱᒋᐊᖅᑎᑕᐅᓯᒪᔪᖅ ᐃᓚᖏᓐᓂᒃ ᐃᓄᐃᑦ ᓄᓇᖏᓐᓂ 2021ᒥ ᑲᔪᓰᓐᓇᕐᓂᐊᖅᑐᓂᓪᓗ ᑎᑭᐅᑎᕙᓪᓕᐊᓗᓂ ᐃᓄᐃᑦ ᓄᓇᖓᓐᓄᑦ 2022ᒥ ᐊᒻᒪᓗ 2023ᒥ. ᖃᐅᔨᓴᕈᑕᐅᓯᒪᔪᑦ ᓇᓕᖅᑲᖏᑦ ᐊᑐᐃᓐᓇᕈᕐᓂᐊᖅᑐᑦ ᐊᕐᕌᒍᐃᑦ ᖃᑦᓯᒐᓚᐃᑦ ᓈᓯᒪᓕᖅᑎᓪᓗᒋᑦ.
ᐃᓄᐃᑦ ᐱᓕᕆᐊᖃᓪᓚᕆᑦᑐᖅ ᐊᓯᔾᔨᕆᐊᖅᑕᐅᓗᓂ ᖃᓄᖅ ᑲᑎᖅᓱᖅᑕᐅᕙᑦᑐᑦ ᐊᑐᖅᑕᐅᔪᑦᓴᒫᖑᒻᒪᖔᑕ, ᐊᐅᓚᑕᐅᓗᑎᑦ ᐊᒥᖅᑳᒍᑕᐅᓗᑎᓪᓗ. ᖃᓄᐃᑉᐱᑖ? ᑲᓇᑕᓕᒫᕐᒥ ᐃᓄᐃᑦ ᖃᓄᐃᓐᓂᖏᓐᓂᒃ ᖃᐅᔨᓴᕐᓂᖅ ᐊᐱᖅᓲᑎᒃᑯᑦ ᐃᓄᓐᓄᑦ ᓇᒻᒥᓂᖅᓲᑎᐅᓂᐊᖅᑐᖅ ᐃᓄᓐᓄᓪᓗ ᐊᐅᓚᑕᐅᓗᓂ. ᐱᓕᕆᖃᑎᑦᓴᓂᒃ ᕿᓂᕐᓂᐊᖅᑐᑦ ᐃᓄᓐᓂᑦ ᐱᑦᓯᐊᕐᓂᖃᖅᑐᓂᒃ ᓇᒻᒥᓂᖅᓱᕈᒪᓂᖏᓐᓄᑦ ᑲᑎᖅᓱᐃᓂᖃᑦᓯᐊᖁᓪᓗᒋᑦ ᐱᐅᓂᖅᐹᖑᒋᐊᖅᑐᓂᒃ. ᑐᕌᒐᕆᔭᖓᑦ ᐃᓚᖓᑕ ᐃᓗᓯᓕᕆᓂᒃᑯᑦ ᖃᐅᔨᓴᕐᓂᕐᒥ ᐊᐱᖅᓲᑎᒃᑯᑦ ᓱᓇᒃᑯᑖᒻᒪᕆᓐᓂᒃ ᓴᓇᕙᓪᓕᐊᖁᓪᓗᒋᑦ ᐊᔪᙱᓐᓂᐅᔪᓂᓪᓕ ᐃᓄᐃᑦ ᐊᐅᓚᑦᓯᒍᓐᓇᖁᓪᓗᒋᑦ ᖃᐅᔨᓴᕐᓂᐅᔪᓕᒫᕐᓂᒃ ᐊᑕᐃᓐᓇᓕᒫᖅᑐᒥᒃ. ᐱᓕᕆᖃᑎᖃᑦᓯᐊᕐᓂᖅ ᐱᕈᖅᐸᓪᓕᐊᑎᑦᓯᓂᐊᖅᑐᖅ ᐊᔪᕈᓐᓃᖅᐸᓪᓕᐊᓂᕐᒥᒃ ᐱᓕᒻᒪᓴᖅᑕᐅᕙᓪᓕᐊᓗᑎᑦ, ᑐᑭᓯᒋᐊᕈᑎᑦᓴᓂᒃ ᐊᒥᖅᑳᓪᓗᑎᑦ ᖃᐅᔨᒪᔨᑕᐅᓂᕐᒥᓂᓪᓗ ᐊᒥᖅᑳᖃᑎᒌᓪᓗᑎᑦ.
ᑖᓐᓇ ᖃᓄᐃᑉᐱᑖ? ᑲᓇᑕᓕᒫᕐᒥ ᐃᓄᐃᑦ ᖃᓄᐃᓐᓂᖏᓐᓂᒃ ᖃᐅᔨᓴᕐᓂᖅ ᐊᐱᖅᓲᑎᒃᑯᑦ ᐃᓄᓐᓄᑦ ᓇᒻᒥᓂᖅᓲᑎᐅᑎᓪᓗᒍ ᐊᐅᓚᑕᐅᑎᓪᓗᒍᓪᓗ, ᐃᓄᐃᑦ ᓯᕗᓕᕐᓂᐊᖅᑐᖅ ᐊᐅᓚᑕᐅᓂᓕᒫᖓᓂᒃ ᖃᐅᔨᓴᕐᓂᖅ ᐊᐱᖅᓲᑎᒃᑯᑦ. ᐊᑐᓂ ᐃᓄᐃᑦ ᓄᓇᖏᑦ ᐊᕕᑦᑐᖅᓯᒪᔪᓂ ᑲᑎᒪᔨᕋᓛᖃᖅᑐᖅ ᐃᓄᐃᑦ ᐃᓚᐅᑎᑕᐅᑦᓯᐊᖁᓪᓗᒋᑦ ᖃᐅᔨᓴᕐᓂᖅ ᐊᐱᖅᓲᑎᒃᑯᑦ ᐊᑐᖅᑕᐅᓂᓕᒫᖓᓂ. ᐆᑦᑑᑎᒋᓗᒍ, ᐃᓄᐃᑦ ᑐᓴᕆᐊᕐᕕᐅᖃᑦᑕᕐᓂᐊᖅᑐᑦ ᓇᓗᓇᐃᖅᓯᖁᔭᐅᓗᑎᑦ ᐃᓗᓯᓕᕆᓂᕐᒧᑦ ᓯᕗᓪᓕᐅᑎᑕᐅᖁᔭᖏᓐᓂᒃ, ᓄᓇᓕᓐᓂ ᓯᕗᓕᖅᑏᑦ ᓲᕐᓗ ᒪᐃᔭᐃᑦ ᐃᓚᐅᑎᑕᐅᓂᐊᖅᑐᖅ ᐱᓕᕆᖃᑎᐅᓗᑎᓪᓗ ᓴᖅᑭᔮᖅᑎᑕᐅᒋᐊᕐᓂᖓᓂᒃ ᖃᐅᔨᓴᕐᓂᐅᔪᖅ ᐊᐱᖅᓲᑎᒃᑯᑦ, ᓄᓇᓕᓐᓂ ᐃᓄᐃᑦ ᐊᐱᖅᓱᖅᑎᐅᓂᐊᖅᑐᑦ, ᑐᓵᔨᐅᓗᑎᑦ ᖃᐅᔨᒪᔨᑕᕆᔭᐅᓗᑎᓪᓗ ᐋᖅᑭᑦᓯᒪᓂᐅᔪᓂ ᐃᓄᐃᓪᓗ ᐱᓕᒻᒪᓴᖅᑎᑕᐅᓂᐊᖅᑐᑦ ᕿᒥᕐᕈᒋᐊᕐᓂᕐᒥᒃ ᐊᒻᒪᓗ ᐊᑐᐃᓐᓇᕈᖅᑎᒃᓯᓂᕐᒥ ᑐᑭᓯᒋᐊᕈᑎᖏᓐᓂᒃ.
ᖃᓄᐃᑉᐱᑖ? ᐱᓕᕆᖃᑎᒌᖏᑦ ᑲᙳᓇᖅᑐᖁᑎᐅᔪᓂᒃ ᑐᓴᖅᑕᐅᒋᐊᖃᙱᑦᑐᓂᓪᓗ ᐃᓚᐅᖃᑕᐅᔪᓅᖓᔪᓂᒃ ᐱᒻᒪᕆᐅᑎᑦᓯᔪᑦ. ᐊᑐᓂ ᐃᓄᒻᒨᖓᔪᑦ ᑐᑭᓯᒋᐊᕈᑏᑦ, ᓲᕐᓗ ᐊᑎᖏᑦ ᑐᕌᕈᑎᖏᓪᓗ, ᐃᒻᒥᒃᑰᖓᑎᓪᓗᒋᑦ ᑐᖅᑯᖅᑕᐅᓯᒪᔪᑦ ᐱᔭᕇᖅᑕᐅᓯᒪᔪᓂᒃ ᐊᐱᖅᓲᑎᓂ. ᑕᒪᓐᓇ ᑐᑭᖃᖅᑐᖅ ᑕᑯᔭᐅᓂᐊᙱᒋᐊᖏᑦ ᐊᑎᖏᑦ ᑭᐅᔾᔪᑎᒋᓯᒪᔭᖏᓪᓗ. ᐊᑐᓂ ᐃᓚᐅᖃᑕᐅᔪᑦ ᖃᓄᐃᑉᐱᑖ? ᐱᓕᕆᖃᑎᒌᑦᑐᓂ, ᑕᑯᒍᓐᓇᖅᑎᑕᐅᔪᑦ ᑭᐅᔾᔪᑎᐅᓯᒪᔪᓂᒃ, ᐊᑎᓕᐅᖅᓯᒪᔪᑦ ᑲᙳᓇᖅᑐᓕᕆᓂᕐᒧᑦ ᐊᖏᖃᑎᒌᒍᑎᒥᒃ, ᓴᐳᑎᔭᐅᓪᓗᑎᑦ ᑲᙳᓇᖅᑐᖁᑎᖏᑦ ᑭᐅᔾᔪᑕᐅᓯᒪᔪᓂ. ᐊᑐᓂ ᑐᑭᓯᒋᐊᕈᑎᑦᓴᖏᑦ ᐃᓚᐅᖃᑕᐅᔪᓂ ᑲᙳᓇᖅᑑᑎᑕᐅᓂᐊᖅᑐᑦ ᐊᑐᖅᑕᐅᓂᐊᖅᓱᑎᓪᓗ ᓈᓴᐃᔨᓄᑦ ᑐᕌᖓᔪᑑᑎᓪᓗᒋᑦ. ᑕᒪᓐᓇ ᑐᑭᖃᖅᑐᖅ ᑭᐅᔾᔪᑕᐅᓯᒪᔪᑦ ᑲᑎᑕᐅᓂᐊᖅᑐᖅ ᐊᓯᓕᒫᖏᓐᓄᑦ ᑭᐅᔾᔪᑎᐅᓯᒪᔪᓄᑦ ᓈᓴᐃᒍᑕᐅᓗᑎᑦ ᐅᓂᒃᑲᐅᓯᓕᐅᕈᑎᐅᓗᑎᓪᓗ ᓈᓴᐅᑎᑎᒍᑦ. ᐃᓚᖓᑦ ᐆᑦᑑᑎᐅᒍᓐᓇᖅᑐᖅ ᓈᓴᐃᓂᕐᒥᒃ ᐅᓇ, “ᐳᓴᓐᑎᖓ (%) ᐃᓄᐃᑦ ᐅᖃᐅᓯᖃᖅᓯᒪᔪᑦ ᖃᓄᐃᙱᑦᓯᐊᓪᓚᕆᓐᓂᕐᒥᒃ ᐅᒡᕙᓘᓐᓃᑦ ᖃᓄᐃᙱᑦᓯᐊᕐᓂᕐᒥᒃ”.
ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑎᒥᐅᔪᑦ ᖃᐅᔨᓴᕐᓂᖃᖅᑐᐃᑦ ᐊᕕᑦᑐᖅᓯᒪᕕᒻᒥᓂ ᑐᖅᑯᖅᑐᐃᓂᐊᖅᑐᑦ ᐃᑎᖅᑕᐅᑐᐃᓐᓇᕈᓐᓇᙱᑦᑐᒧᑦ ᐃᑭᐊᖅᑭᕕᒃᑰᕈᓐᓇᐅᑎᒧᑦ ᐊᐅᓚᑦᓯᓂᐊᖅᓱᑎᓪᓗ ᐊᑐᖅᑕᐅᒍᓐᓇᕐᓂᖏᓐᓂᒃ. ᖃᐅᔨᓴᕐᓂᕐᒥ ᐊᐱᖅᓲᑎᒃᑯᑦ ᑐᑭᓯᒋᐊᕈᑏᑦ ᑲᑎᑕᐅᓂᐊᕐᒥᔪᑦ ᐊᓯᖏᓐᓂ ᐃᓄᐃᑦ ᓄᓇᖏᓐᓂ ᐊᕕᑦᑐᖅᓯᒪᔪᓃᑦᑐᓂ ᑲᓇᑕᓕᒫᕐᒥ ᑲᑎᖅᓱᖅᑕᐅᓯᒪᔪᖃᖁᓪᓗᒍ. ᑲᓇᑕᓕᒫᕐᒥ ᑲᑎᖅᓱᖅᑕᐅᓯᒪᔪᖅ ᑐᖅᑯᖅᑕᐅᓂᐊᖅᑐᖅ ᐃᑭᐊᖅᑭᕕᒃᑰᕈᓐᓇᐅᑎᖓᓄᑦ ᐃᓄᐃᑦ ᑕᐱᕇᑦ ᑲᓇᑕᒥᒃᑯᓐᓂ ᐋᑐᕚᒥ.