ᐊᐅᓚᑦᓯᔨᐅᓂᖅ
ᑖᒃᑯᐊ ᖃᓄᐃᑉᐱᑖ? ᑲᓇᑕᒥ ᐃᓄᐃᑦ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᖃᐅᔨᓴᖅᑎᖏᑦ (QNIHS) ᐃᓄᓐᓂᑦ ᓇᖕᒥᓂᕆᔭᐅᕗᖅ ᐊᒻᒪᓗ ᐃᓄᖕᓂᒃ ᓯᕗᓕᖅᑎᖃᖅᓱᑎᒃ ᑲᓇᑕᓕᒫᒥ ᐱᓕᕆᐊᖑᕗᖅ.
ᐊᑕᐅᑦᓯᒃᑯᑦ ᐱᓕᕆᐊᖃᖃᑎᒌᒃᐳᑦ ᓯᑕᒪᐅᓪᓗᑎᒃ ᐃᓄᐃᑦ ᓄᓇᓕᕆᓂᕐᒥ ᑲᑐᔾᔨᖃᑎᒌᒋᔭᖏᑦ (ᐅᕝᕙᓘᓐᓃᑦ ᑎᓕᔭᐅᓯᒪᔪᑦ QNIHS-ᒋᔭᖏᑦ) ᐃᑲᔪᖅᑎᒋᓪᓗᒋᑦ ᐃᓄᐃᑦ ᑕᐱᕇᒃᑯᑦ ᑲᓇᑕᒥ (ITK). ᐃᑲᔪᖅᑎᒌᒃᓱᑕ, ᐋᖅᑭᒃᓱᐃᖃᑎᒌᒃᓯᒪᓕᖅᑐᒍᑦ ᑕᐅᑦᑐᕆᓂᐊᖅᑕᖏᓂᒃ ᐊᒻᒪᓗ ᐊᑐᓕᖅᑎᑦᑎᓯᒪᓂᐊᓕᖅᑐᒍᑦ ᐊᑕᐃᓐᓇᖅᑑᓪᓗᑎᒃ ᐃᓅᖃᑎᒌᒃᑐᓂᑦ ᐋᓐᓂᐊᖃᓕᖅᑕᐃᓕᒪᔪᓕᕆᓂᕐᒧᑦ ᐃᓄᐃᑦ ᖃᐅᔨᓴᖅᑎᖏᓐᓂᒃ ᑲᓇᑕᒥ ᑐᓴᐅᒪᑎᑕᐅᓯᒪᔪᓂᒃ ᐃᓄᐃᑦ ᖃᐅᔨᒪᔭᖏᓐᓂᒃ, ᐊᑐᕐᓂᖃᖅᑎᑕᖏᓐᓂᒃ ᐊᒻᒪᓗ ᓯᓚᕐᔪᐊᓕᒫᒥ ᐃᓱᒪᔾᔪᓯᕆᔭᐅᔪᓂᒃ, ᐃᓚᖃᖅᑎᓪᓗᒋᑦ ᑎᒍᒥᐊᖅᑎᒋᔭᐅᓪᓗᑎᒃ ᐱᓕᕆᐊᖃᖅᑎᐅᔪᑦ ᐱᓕᕆᐊᖃᖃᑕᐅᓂᖏᓐᓂᑦ ᐊᒻᒪᓗ ᓄᑕᐅᓂᖅᐹᑎᒍᑦ ᐋᓐᓂᐊᖃᓕᖅᑕᐃᓕᒪᔪᓕᕆᓂᕐᒧᑦ ᖃᐅᔨᓴᐃᔨᒻᒪᕇᑦ ᖃᐅᔨᓴᐃᓂᖏᓐᓂᒃ.
ᐃᓄᐃᑦ ᑲᑐᔾᔨᖃᑎᒌᖏᑦ ᓇᐅᑦᓯᖅᑐᐃᔨᐅᕗᑦ ᐱᓕᕆᓂᐅᔪᓕᒫᓂᒃ QNIHS-ᒋᔭᐅᔪᓄ. ᐊᒻᒪᓗᒃᑲᓐᓂᖅ, ᐃᓄᐃᑦ ᑲᑐᔾᔨᖃᑎᒌᖏᑦ ᐊᐅᓚᑦᓯᔨᐅᕗᑦ ᐊᒻᒪᓗ ᑐᑭᒧᐊᒃᑎᑦᑎᔨᐅᕙᒃᓱᑎᒃ ᐊᐱᖅᑯᑎᓕᐊᖑᓯᒪᔪᓄᑦ ᑐᑭᓯᒋᐊᕐᕕᒃᓴᖁᑎᓂᒃ, ᐃᓚᖃᖅᑎᓪᓗᒋᑦ ᐋᖅᑭᒃᓱᐃᓯᒪᓕᖅᐸᓐᓂᕐᓄᑦ ᖃᐅᔨᔭᐅᓯᒪᓕᓚᐅᑐᓂᒃ ᐱᓕᕆᐊᕆᔭᖏᓐᓂᑦ ᐊᒻᒪᓗ ᐊᑐᐃᓐᓇᐅᑎᑕᐅᔪᓂᑦ ᐃᓄᖕᓂᑦ ᐊᒻᒪᓗ ᑲᑐᔾᔨᖃᑎᒌᓂᑦ ᐱᔨᑦᓯᕋᖅᑎᒋᔭᐅᓪᓗᑎᒃ ᐃᓄᓕᒫᓂ ᐃᓅᖃᑎᒌᒃᑐᓄᑦ. ᑕᒪᕐᒥᒃ ᑐᑭᓯᒋᐊᕐᕕᒃᓴᖁᑎᑦ ᐊᒻᒪᓗ ᑐᓴᒐᒃᓴᐃᑦ ᐱᔭᐅᓯᒪᔪᑦ ᐊᐱᖅᑯᑎᒃᓴᓕᐊᖑᓯᒪᔪᓂᑦ ᓇᖕᒥᓂᕆᔭᐅᓂᐊᖅᑐᑦ ᐊᒻᒪᓗ ᐊᐅᓚᑕᐅᓗᑎᒃ ᐃᓄᖕᓂᑦ.
ᖃᓄᐃᑉᐱᑖ? ᑲᓇᑕᒥ ᐃᓄᐃᑦ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᖃᐅᔨᒋᐊᖅᑎᖏᑕ ᐱᓕᕆᐊᖃᖅᑎᐅᓪᓗᑎᒃ ᑎᒥᖁᑎᖓᑦ (NIHSWG) ᐃᓕᔭᐅᓯᒪᕗᑦ ᐊᖏᓂᖅᓴᐅᓪᓗᓂ ᐋᖅᑭᒃᓱᐊᖑᓯᒪᔪᓄᑦ ᐃᓄᐃᑦ ᐊᐅᓚᑦᓯᔨᐅᓂᖏᓐᓄᑦ. ᑖᒃᑯᐊ NIHSWG-ᑯᑦ ᑲᑎᖖᒐᔨᐊᕈᓯᕆᔭᐅᕗᑦ ᑲᓇᑕᒥ ᐃᓄᐃᑦ ᐋᓐᓂᐊᖅᓯᐅᖅᑎᓕᕆᓂᕐᒧᑦ ᑲᑎᒪᔨᕋᓛᖏᓐᓂᑦ (NICoH). ᑖᒃᑯᐊ NICoH-ᑯᑦ ᓴᓇᕐᕈᑎᓕᕆᓂᕐᒧᑦ ᑐᑭᒧᐊᒃᑎᑦᓯᔨᐅᕙᒃᐳᑦ ᐊᒻᒪᓗ ᐊᑐᓕᖁᔭᐅᔪᓄᑦ ᐃᓱᒪᓕᐅᕈᑎᓕᐅᖅᑎᐅᕙᒃᓱᑎᒃ ᑐᕌᖓᔪᓄᑦ ᑲᓇᑕᒥ ᐃᓄᐃᑦ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᕿᒥᕐᕈᓂᐅᔪᓄᑦ, ᐋᖅᑮᒋᐊᕐᓂᐅᔪᓄᑦ ᐊᒻᒪᓗ ᒪᓕᒐᖁᑎᓕᐅᕐᓂᕐᒧᑦ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᑲᑎᒪᔨᖏᓐᓄᑦ.
ᒪᓕᒡᓗᒋᑦ ᐅᖃᖅᓯᒪᓂᖏᑦ ᑲᓇᑕᒥ ᐃᓄᐃᑦ ᖃᐅᔨᓴᐃᓂᕐᒧᑦ ᐸᕐᓇᐃᔾᔪᑎᓕᐊᖏᑦ, “ᐃᓄᐃᑦ ᐊᐅᓚᑦᓯᔨᐅᓂᖏᓐᓄᑦ ᐋᖅᑭᒃᓱᐊᖑᓯᒪᔪᓂᒃ ᐊᑐᕐᓗᓂ ᐱᓕᕆᐊᖃᖃᑎᒌᓐᓂᕐᒥ ᐊᒻᒪᓗ ᐊᒥᖅᑲᕈᑎᒋᓪᓗᒋᑦ ᐃᓱᒪᓕᐅᕈᑎᓕᐅᕐᓂᕐᒧᑦ ᐃᑲᔪᕈᑎᐅᒻᒪᑕ ᐃᓱᒪᖅᓱᕈᓐᓇᐅᑎᒥᒃᑎᒍᑦ ᐃᓄᐃᑦ ᐱᔾᔪᑎᖃᖅᑎᑕᐅᓂᖏᓐᓄᑦ ᐊᒻᒪᓗ ᐃᓱᒪᓕᐅᕈᑎᓕᐅᕐᓂᐅᕙᒃᑐᓄᑦ ᐊᕕᒃᑐᖅᓯᒪᓂᐅᔪᑦ ᐃᓗᐊᓃᑦᑐᑎᒍᑦ, ᐊᕕᒃᑐᖅᓯᒪᓂᐅᔪᑎᒍᑦ, ᑲᓇᑕᒥ, ᐊᒻᒪᓗ ᓯᓚᕐᔪᐊᓕᒫᒥᐅᑦ ᖁᑦᑎᖕᓂᖏᑎᒍᑦ.” ᑕᒪᓐᓇ ᑐᑭᖃᕐᒪᑦ ᑖᒃᑯᐊ QNIHS-ᒋᔭᐅᔪᑦ ᐃᓗᐊᓃᑎᑕᐅᓂᖏᑕ ᐋᖅᑭᒃᓱᒐᐅᓯᒪᔪᓄᑦ ᓯᕗᓪᓕᖅᐸᐅᑎᑕᐅᔭᕆᐊᖃᕐᓂᖏᑦ ᐃᓄᐃᑦ ᐱᔾᔪᑎᖃᕐᕕᐅᓂᖏᓐᓂ ᐊᒻᒪᓗ ᐃᓱᒪᓕᐅᕈᑎᓕᐅᕐᓂᖏᓂ ᐃᓕᔭᐅᓯᒪᓕᖁᓪᓗᒋᑦ.
ᑐᑭᒧᐊᒍᑎᒃᓴᕆᔭᐅᔪᑦ ᑐᖖᒐᕝᕕᖏᑦ
ᐊᕕᒃᑐᖅᓯᒪᓂᕆᔭᐅᔪᐃᑦ ᐊᒻᒪᓗ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᓇᓗᓇᐃᔭᐃᓯᒪᓕᖅᑐᑦ 6-ᖑᔪᓂᒃ ᑐᑭᒧᐊᒍᑎᒃᓴᕆᔭᐅᔪᓄᑦ ᑐᖖᒐᕝᕕᖁᑎᐅᓂᐊᖅᑐᓂᒃ ᐱᓕᕆᐊᑉ ᑕᐅᑦᑐᖓᓄᑦ ᐊᒻᒪᓗ ᐊᑐᓕᖅᑎᑕᐅᓂᒃᓴᖏᓄᑦ ᑎᑭᓯᒪᓕᖅᑎᑕᐅᖁᓪᓗᒋᑦ ᖃᓄᐃᑦᑑᖁᔭᑦᑎᓐᓄᑦ. ᑕᒪᒃᑯᐊ ᑐᖖᒐᕕᐅᔪᑦ ᓇᓗᓇᐃᔭᐃᓯᒪᕗᑦ ᖃᓄᖅ ᐱᓕᕆᓂᖃᕐᓂᑦᑎᓐᓄᑦ ᑕᐅᑦᑐᕆᓂᐊᖅᑕᖏᓂᒃ ᐊᒻᒪᓗ ᐊᑐᓕᖅᑎᑕᐅᓂᒃᓴᖏᑕ ᖃᐅᔨᓴᐃᓂᐅᔪᓄᑦ, ᐃᓚᖃᖅᑎᓪᓗᒋᑦ ᖃᐅᔨᓴᐃᓂᕐᒥ ᐃᓗᓕᕆᔭᐅᓂᐊᖅᑐᓄᑦ ᐊᒻᒪᓗ ᐱᓕᕆᔾᔪᓯᐅᕙᓐᓂᐊᕐᓂᖏᓐᓄᑦ, ᐊᒻᒪᓗ ᖃᓄᖅ ᐱᓕᕆᐊᖃᖃᑎᒋᔭᑦᑎᓐᓂᒃ ᐱᓕᕆᖃᑎᖃᕐᓂᑦᑎᓐᓄᑦ ᐊᒻᒪᓗ ᐃᓱᒪᓕᐅᕈᑎᓕᐅᖅᐸᓐᓂᐊᕐᓂᕐᓄᑦ.
ᐃᑲᔪᖅᑎᒌᖕᓂᖅ
ᐱᓕᕆᓪᓗᐊᕐᓂᖃᖅᐸᒃᑐᑦ ᐱᓕᕆᐊᖃᕈᑎᐅᔪᓂ
ᓄᑖᑎᒍᑦ ᐱᓕᕆᔾᔪᑎᑎᒍᑦ
ᐃᓄᐃᑦ ᓇᖕᒥᓂᖅ ᐃᓱᒪᓕᐅᕈᑎᒋᓯᒪᔭᖓ
ᑐᕌᖓᑎᑕᐅᓯᒪᓂᖏᑦ ᐃᓄᐃᑦ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᐊᒻᒪᓗ ᐃᓅᖃᑎᒌᖕᓂᖏᑦ ᓇᓕᖅᑲᐅᑎᑕᐅᓯᒪᓂᖏᑦ
ᓴᖖᒋᓂᕆᔭᐅᔪᓄᑦ ᑐᖖᒐᕝᕕᖃᖅᑎᑕᐅᔪᑦ
ᖃᓄᐃᑉᐱᑖ? ᑲᓇᑕᒥ ᐃᓄᐃᑦ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᖃᐅᔨᓴᖅᑎᖏᑦ (QNIHS) ᐱᕈᖅᑎᑕᐅᓯᒪᕗᑦ ᓯᕗᕐᖓᓂ ᐃᓄᐃᑦ ᐋᓐᓂᐊᖃᕐᓇᒋᑦᑐᓕᕆᓂᕐᒧᑦ ᖃᐅᔨᓴᐃᓂᕆᓚᐅᖅᑕᖏᓂᑦ ᐊᐅᓚᑕᐅᓪᓗᑎᒃ ᓄᓇᕕᒃᒥ 2004-ᖑᑎᓪᓗᒍ ᐊᒻᒪᓗ 2017-ᖑᑎᓪᓗᒍ ᓄᓇᓕᒋᔭᐅᔪᓕᒫᓂ ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ, ᓄᓇᕗᒻᒥ ᐊᒻᒪᓗ ᓄᓇᑦᓯᐊᕗᑦᒥ 2007-2008 ᐅᑭᐅᖏᑦ ᐊᑐᖅᑎᓪᓗᒋᑦ.
ᐅᑭᐅᖏᑦ 2004 ᐊᒻᒪᓗ 2017 ᐊᑐᖅᑎᓪᓗᒋᑦ ᓄᓇᕕᖕᒥ ᐃᓄᐃᑦ ᐋᓐᓂᐊᖃᕐᓇᒋᑦᑐᓕᕆᓂᕐᒧᑦ ᖃᐅᔨᓴᐃᓂᖏᑦ ᐱᓕᕆᐊᖑᓚᐅᖅᐳᑦ ᑕᒪᐃᓐᓂ ᓄᓇᓕᒋᔭᐅᔪᓂ ᓄᓇᕕᖕᒥ ᐊᒻᒪᓗ ᐱᓕᕆᐊᖑᓪᓗᑎᒃ ᐱᓕᕆᖃᑎᒌᖕᓂᖏᓂᑦ ᓯᓚᑦᑐᖅᓴᖅᕕᖕᒥᑦ ᖃᐅᔨᓴᐃᔨᐅᔪᑦ ᐊᒻᒪᓗ ᐃᓄᐃᑦ ᑲᑐᔾᔨᖃᑎᒌᖏᑦ. 2007-2008-ᒥ ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ, ᓄᓇᕗᑦᒥ ᐊᒻᒪᓗ ᓄᓇᑦᓯᐊᕗᑦᒥ ᐃᓄᐃᑦ ᐋᓐᓂᐊᖃᕐᓇᒋᑦᑐᓕᕆᓂᕐᒧᑦ ᖃᐅᔨᓴᕐᓂᖓᑦ ᑮᓇᐅᔭᖁᑎᒃᓴᖃᖅᑎᑕᐅᓚᐅᖅᐳᑦ ᓯᓚᕐᔪᐊᓕᒫᒥ ᐅᑭᐅᖅᑕᖅᑐᒥᐅᑦ ᐅᑭᐅᖓᓂ ᐱᓕᕆᐊᖑᓕᖅᓯᒪᔪᑎᒍᑦ ᐊᒻᒪᓗ ᓯᕗᓕᖅᑎᖃᖅᓱᑎᒃ ᓯᓚᑦᑐᖅᓴᖅᕕᖕᒥ ᖃᐅᔨᓴᐃᔨᐅᔪᓂᒃ ᐱᓕᕆᖃᑎᒋᓪᓗᒋᑦ ᐃᓄᐃᑦ ᑲᑐᔾᔨᖃᑎᒌᒋᔭᖏᑦ. ᑖᒃᑯᓂᖓ ᖃᐅᔨᓴᐃᓂᐅᓚᐅᖅᑐᓄᑦ, ᖃᐅᔨᓴᐃᔨᒋᔭᐅᔪᑦ ᐅᒥᐊᕐᔪᐊᒃᑯᑦ ᑕᒪᐃᓐᓄᑦ ᓄᓇᓕᐅᔪᓄᐊᖃᑦᑕᓚᐅᖅᐳᑦ. ᐃᓚᒋᔭᐅᖃᑕᐅᔪᑦ ᐅᒥᐊᕐᔪᐊᒥ ᐃᑭᒪᖃᑕᐅᓗᑎᒃ ᐱᓕᕆᐊᒃᓴᐅᔪᓂᒃ ᐱᓕᕆᐊᖄᓂᒋᐊᕈᑎᓂᒃ ᐱᓕᕆᓂᖃᕈᓐᓇᖅᑎᑕᐅᓪᓗᑎᒃ.
ᐅᑭᐅᓂ ᐊᑐᓵᖅᓯᒪᔪᓂ, ᐊᒥᓱᕈᖅᐸᓪᓕᐊᓯᒪᕗᑦ ᐃᓄᖕᓂᑦ ᐋᓐᓂᐊᖃᕐᓇᒋᑦᑐᓕᕆᓂᕐᒧᑦ ᖃᐅᔨᓴᕐᓂᐅᕙᒃᑐᑦ ᑕᒪᐃᑎᒍᑦ ᓇᖕᒥᓂᕆᔭᐅᓕᖁᓪᓗᒋᑦ, ᐊᐅᓚᑕᓗᑎᒃ ᐊᒻᒪᓗ ᓯᕗᓕᖅᑎᖃᖅᐸᒃᓗᑎᒃ ᐃᓄᐃᑦ ᑲᑐᔾᔨᖃᑎᒌᒋᔭᖏᓂᒃ. 2018-ᒥ, ᑮᓇᐅᔭᖁᑎᒃᓴᐅᓂᐊᖅᑐᓄᑦ ᑐᓴᖅᑎᑕᐅᓯᒪᓕᓚᐅᖅᐳᑦ ᐊᑕᐃᓐᓇᖅᑐᒥᒃ ᐃᓄᐃᑦ ᐋᓐᓂᐊᖃᕐᓇᒋᑦᑐᓕᕆᓂᕐᒧᑦ ᖃᐅᔨᓴᐃᓂᕐᒥ ᐱᓕᕆᐊᖑᔪᑦ ᐋᖅᑭᒃᑕᐅᓯᒪᓕᕐᓂᐊᕐᓂᖏᑕ ᐱᓕᕆᓂᖃᕐᓂᐊᖅᑐᓂᒃ:
- ᐱᕈᖅᑎᑕᐅᓯᒪᓕᖁᓪᓗᒋᑦ ᐱᓕᕆᐊᖃᖅᑎᐅᔪᓐᓇᕐᓃᑦ ᐃᓄᐃᑦ ᓄᓇᓕᒋᔭᖏᑕ ᐃᓗᐊᓂ ᐋᖅᑭᒃᓱᐃᔨᐅᓂᐊᖅᑐᓂᒃ ᐊᒻᒪᓗ ᑲᑎᖅᓱᐃᔨᐅᓂᐊᖅᑐᓂᒃ ᖃᐅᔨᓴᐃᓂᕐᒥ ᑐᓴᒐᒃᓴᖁᑎᓂᒃ; ᐊᒻᒪᓗ
- ᐃᑲᔪᖅᑐᐃᓯᒪᓂᐊᖅᑐᓂᒃ ᐃᓄᐃᑦ ᓇᖕᒥᓂᖅ ᐃᓱᒪᓕᐅᕈᑎᓕᐅᕈᓐᓇᕐᓂᖏᓂᒃ ᐋᖅᑭᒃᓱᐃᓂᕐᒥ ᖃᐅᔨᓴᐃᓂᐅᕙᒃᑐᓄᑦ ᐱᓕᕆᐊᒃᓴᐅᓂᐊᖅᑐᓂᒃ ᐊᕕᒃᑐᖅᓯᒪᓂᐅᔪᓂ ᐊᒻᒪᓗ ᓄᓇᓕᒋᔭᐅᔪᓂ.
ᑕᐃᒪᖖᒐᓂᑦ 2018-ᒥ, ᐃᓄᐃᑦ ᑲᑐᔾᔨᖃᑎᒌᖏᑦ ᐊᒃᓱᕈᖅᓱᑎᒃ ᐋᖅᑭᒃᓱᐃᓯᒪᓕᕋᓱᐊᖅᓯᒪᕗᑦ ᓯᕗᓪᓕᖅᐹᕐᓯᐅᑎᓂᒃ ᑐᑭᓯᒋᐊᕐᕕᒃᓴᖁᑎᓂᒃ ᑲᑎᖅᓱᐊᓂᒃ ᐱᓯᒪᓕᕋᓱᒃᖢᑎᒃ ᐊᑐᖅᑕᐅᔪᒃᓴᓂᒃ QNIHS-ᓂᑦ. ᖃᐅᔨᓴᐃᓂᕐᒥ ᐱᔾᔪᑎᒋᓗᐊᖅᓱᒍ ᑐᕌᕐᕕᒃᓴᖃᕐᒪᑕ ᐱᑕᖃᓕᖅᑎᑦᑎᒋᐊᒥᓐᓄᑦ ᐱᓕᒻᒪᒃᓴᐃᓂᐅᓕᕋᔭᖅᑐᓂᒃ ᐊᒻᒪᓗ ᑮᓇᐅᔭᖁᑎᒃᓴᓂᒃ ᐊᔪᖖᒋᓐᓂᖃᓕᖅᑎᑕᐅᖁᓪᓗᒋᑦ ᐃᓄᐃᑦ ᖃᐅᔨᓴᐃᔨᐅᕙᒋᐊᒥᓐᓄᑦ, ᑲᔪᓰᓐᓇᖅᑎᑕᐅᓯᒪᓗᑎᒃ ᐱᓕᕆᐊᖑᕙᓐᓂᐊᖅᑐᓂᒃ. ᑕᒪᒃᑯᐊ ᑕᕝᕙᑲᐅᑎᒋ ᐋᖅᑭᐅᒪᓕᖅᑎᑕᐅᔪᓐᓇᖖᒋᒻᒪᑕ, ᑭᓯᐊᓂᓗ ᐃᑲᔪᕈᑎᐅᖕᒥᔪᑦ ᐃᓄᐃᑦ ᐊᖏᓂᖅᓴᐅᔪᒥᒃ ᐊᐅᓚᑦᓯᓂᖃᓕᕐᓂᒃᓴᖏᑕ ᖃᐅᔨᒋᐊᕐᓂᐅᕙᒃᑐᓄᑦ ᐊᒻᒪᓗ ᖃᐅᔨᓴᐃᓂᐅᕙᒃᑐᑦ ᑐᕌᖓᑎᓪᓗᒋᑦ ᖃᐅᔨᒪᔨᒻᒪᕆᐅᓃᑦ ᐊᒻᒪᓗ ᐃᖅᑲᓇᐃᔮᖑᔪᑦ ᐃᓄᐃᑦ ᓄᓇᓕᖏᓐᓃᖏᓐᓇᖅᑎᑕᐅᖁᓪᓗᒋᑦ.